تابىسى كۇنكورىس دەڭگەيىنەن تومەن ازاماتتارعا كرەديت بەرۋگە تىيىم سالىنادى - ۇلتتىق بانك
بۇل تۋرالى بۇگىن ۇكىمەت وتىرىسىندا ۇلتتىق بانك ءتوراعاسى ەربولات دوسايەۆ ايتتى، دەپ حابارلايدى قازاقپارات ءتىلشىسى.
«ءوسىمپۇل مەن ايىپپۇل مولشەرىنىڭ ۇلعايۋى ناتيجەسىندە ازاماتتاردىڭ بەرەشەگىنىڭ باسقارىلمايتىن وسۋىنە جول بەرمەۋ ءۇشىن اعىمداعى جىلدىڭ سوڭىنا دەيىن زاڭنامالىق دەڭگەيدە زاڭدار مەن زاڭ اياسىنداعى نورماتيۆتىك-قۇقىقتىق اكتىلەرگە قاجەتتى تۇزەتۋلەر قابىلدانادى»، - دەدى ول.
ماسەلەن، ە. دوسايەۆتىڭ ايتۋىنشا، مەرزىمى وتكەن بەرەشەگى 90 كۇننەن اسىپ كەتكەن جەكە تۇلعالاردىڭ بارلىق كەپىلسىز تۇتىنۋشىلىق قارىزدارى بويىنشا كرەديتتى بەرۋمەن جانە وعان قىزمەت كورسەتۋمەن بايلانىستى تۇراقسىزدىق ايىبىن، كوميسسيالار مەن وزگە دە تولەمدەردى ەسەپتەۋگە تىيىم سالىندى.
«بۇل ازاماتتاردى بەرەشەكتىڭ ۇنەمى ءوسىپ وتىرعان سوماسىنان قورعاۋعا مۇمكىندىك بەرەدى. تابىسى كۇنكورىس دەڭگەيىنەن تومەن ازاماتتارعا قارىز بەرۋگە تىيىم سالىنادى. سونىمەن قاتار، قارىز الۋشىعا بورىشتىق جۇكتەمە كوەففيتسيەنتىن ەسەپتەۋ ءتارتىبىن قايتا قاراۋ، بانكتەردىڭ مەنشىكتى كاپيتالىنا قويىلاتىن قوسىمشا تالاپتار سياقتى ءبىرقاتار قوسىمشا رەتتەۋ شارالارى كوزدەلەدى. بۇل كەپىلسىز تۇتىنۋشىلىق قارىز بەرۋگە، اسىرەسە تابىسى تومەن ازاماتتارعا قارىز بەرۋگە ازىراق ەكونوميكالىق ىنتالاندىرۋ بولادى»، - دەدى ۇلتتىق بانك باسشىسى.
