قازاقستاندا بارلىق كرەديتتەۋ سۋبەكتىلەرى قاداعالانىپ وتىرادى
بۇل تۋرالى بۇگىن ۇكىمەت وتىرىسىندا ۇلتتىق بانك ءتوراعاسى ەربولات دوسايەۆ ايتتى، دەپ حابارلايدى قازاقپارات ءتىلشىسى.
«ۇلتتىق بانك بانكتەرمەن جانە ميكروقارجى ۇيىمدارىمەن بىرلەسىپ، 2019-جىلعى 1- شىلدەدەگى جاعداي بويىنشا ەسەپتەلگەن، كەپىلسىز تۇتىنۋشىلىق قارىزى بار بارلىق ازاماتتار ءۇشىن ايىپپۇل مەن ءوسىمپۇلدى وتەۋ تەتىگىن ازىرلەدى. بۇل تەتىك العاشقى قادام رەتىندە بانكتەر مەن ميكروقارجى ۇيىمدارىنىڭ ەسەپتەلگەن ايىپپۇل مەن ءوسىمپۇلدى دەربەس كەشىرۋىن بولجايدى. بۇدان كەيىن وپەراتور بانكتەر مەن ميكروقارجى ۇيىمدارىنىڭ شىعىستارىن 70 پايىز ديسكونتپەن وتەۋدى جۇزەگە اسىرادى. ياعني، ءىس جۇزىندە ايىپپۇلدار مەن ءوسىمپۇل سوماسىنان ۇشتەن ەكىسىنەن استامى بانكتەر مەن ميكروقارجى ۇيىمدارىنىڭ قاراجاتى ەسەبىنەن ەسەپتەن شىعارىلادى. بۇل تەتىكتى دە ەكى ايدا اياقتاۋ جوسپارلانۋدا»، - دەدى ۇلتتىق بانك ءتوراعاسى.
ە. دوسايەۆ پارلامەنت سەناتىنىڭ قارجى نارىعىن رەتتەۋ مەن دامىتۋ، ميكروقارجىلىق قىزمەت جانە سالىق سالۋ ماسەلەلەرى بويىنشا زاڭدى قابىلداپ، قازاقستان رەسپۋبليكاسىنىڭ پرەزيدەنتىنە قول قويۋعا ەنگىزگەنىن اتاپ ءوتتى.
«وندا كرەديتتىك سەرىكتەستىكتەردى، لومباردتار مەن ونلاين- كرەديتورلاردى قوسا العاندا، بارلىق كرەديتتەۋ سۋبەكتىلەرىن رەتتەۋ مەن قاداعالاۋدى ەنگىزۋ جانە حالىقتىڭ بورىشتىق جۇكتەمەسىنىڭ باقىلانبايتىن ءوسۋىن شەكتەۋ كوزدەلەدى. ەنگىزىلەتىن زاڭنامالىق وزگەرىستەر قارىز الۋشىلاردىڭ قۇقىقتارى مەن مۇددەلەرىن قورعاۋدى كۇشەيتەدى، رەتتەۋشىلىك تورەلىكتى جانە تۇتىنۋشىلىق كرەديتتەۋ نارىعىنداعى جۇيەلىك پروبلەمالاردى جويادى»، - دەدى ول.
