ومىرلىك قيىن جاعدايدا قالعان ەل ازاماتتارىنىڭ ءتىزىمى جاسالادى
بۇل تۋرالى بۇگىن ۇكىمەت وتىرىسىندا ۇلتتىق بانك ءتوراعاسى ەربولات دوسايەۆ ايتتى، دەپ حابارلايدى قازاقپارات ءتىلشىسى.
ق ر پرەزيدەنتى قاسىم-جومارت توقايەۆتىڭ «قازاقستان رەسپۋبليكاسى ازاماتتارىنىڭ بورىش جۇكتەمەسىن ازايتۋ شارالارى تۋرالى» جارلىعىن ىسكە اسىرۋ ماقساتىندا قازاقستان ۇلتتىق بانكى ۇكىمەتپەن، بانكتەرمەن جانە ميكروقارجى ۇيىمدارىمەن بىرلەسىپ، 2019-جىلعى 1- ماۋسىمداعى جاعداي بويىنشا كەپىلسىز تۇتىنۋشىلىق قارىزدار بويىنشا 300 مىڭ تەڭگەدەن اسپايتىن سومادا ومىرلىك قيىن جاعدايدا قالعان ازاماتتاردىڭ بەرەشەگىن وتەۋ تەتىگىن ازىرلەدى»، - دەدى ول.
ونىڭ اتاپ وتۋىنشە، بۇل تەتىك ەڭبەك جانە حالىقتى الەۋمەتتىك قورعاۋ مينيسترلىگىنىڭ ومىرلىك قيىن جاعدايدا قالعان قازاقستان رەسپۋبليكاسى ازاماتتارىنىڭ ءتىزىمىن جاساۋىن كوزدەيدى. ودان كەيىن اتالعان ءتىزىم بويىنشا بەرەشەك مەملەكەتتىك كرەديتتىك بيۋرومەن، ەكىنشى دەڭگەيدەگى بانكتەرمەن جانە ميكروقارجى ۇيىمدارىمەن سالىستىرىلىپ، تەكسەرىلەدى.
«سودان سوڭ بانكتەرگە جانە ميكروقارجى ۇيىمدارىنا اقشا اۋدارىلادى. بۇل تەتىكتى ەكى اي ىشىندە اياقتاۋ جوسپارلانىپ وتىر. بۇدان ءارى، ەڭبەك مينيسترلىگى ءتىزىمدى ناقتىلاعان جاعدايدا، قارجى مينيسترلىگى مەن ەڭبەك مينيسترلىگى ۇيىمداستىرۋشىلىق جانە قارجىلىق سيپاتتاعى ءتيىستى شارالار قابىلداۋى قاجەت بولادى»، - دەدى ە. دوسايەۆ.
