الماتى جانە جامبىل وبلىستارىنىڭ شەكاراسى وزگەردى
ەندى وڭىرگە تيەسىلى بولعان جالپى اۋماعى 1091,78 گەكتار جەر جامبىل وبلىسىنا بەرىلەدى دەپ حابارلايدى Sputnik قازاقستان.
«الماتى وبلىسىنداعى جالپى اۋماعى 1091,78 گەكتار بولاتىن جەردى جامبىل وبلىسىنىڭ قورداي اۋدانىنا قوسۋ ارقىلى شەكارانى وزگەرتۋ كەرەك»، - دەپ جازىلعان ەلەكتروندى ۇكىمەت سايتىندا جاريالانعان اقپاراتتا.
وسىلايشا، ق ر قورعانىس مينيسترلىگىنىڭ اۋداندىق گۆارديالىق ەكسپلۋاتاتسيالىق ءبولىمى، بيولوگيالىق قاۋىپسىزدىك پروبلەمالارىن عىلىمي-زەرتتەۋ ينستيتۋتى جانە بۇرىنعى «الماتى» اسكەري سوۆحوزى سىندى نىساندارى جامبىل وبلىسىنا بەرىلەدى.
شەكارانى جوسپارلاۋ كەزىندە «الماتى» سوۆحوزىنىڭ تۇرعىندارى مەملەكەتتىك قىزمەتتى ۇزىناعاش اۋىلىنا بارىپ العانى ايتىلدى. ول سوۆحوزدان 150 شاقىرىم جەردە ورنالاسقان.
جەر جامبىل وبلىسىنا بەرىلگەن سوڭ حالىققا قىزمەت كورسەتۋ ورتالىقتارى الدەقايدا جاقىنداي تۇسپەك. ەندى قاجەتتى قۇجاتتى الۋ ءۇشىن تۇرعىندار 80 شاقىرىم جەردەگى قورداي اۋدانىنىڭ ورتالىعىنا بارادى.
