قازاقستاندىق كارەتەشى وليمپيادالىق رەيتينگتە كوش باستادى
ق ر ۇلتتىق وليمپيادا كوميتەتى حابارلاعانداي، اتالعان رەيتينگتە 60 كەلىدە سىنعا تۇسەتىن قازاقستاندىق كاراتەشى دارحان ءاسادىلوۆ شىلدە ايىندا وليمپيادالىق سالماقتىڭ كوشىن باستادى.
«ازيا ويىندارى مەن ءىرى حالىقارالىق تۋرنيرلەردىڭ جەڭىمپازى، سونداي- اق، كاراتەدەن الەم چەمپيوناتىنىڭ جۇلدەگەرى دارحان ءاسادىلوۆ ءوز سالماعىندا ءبىرىنشى ورىنعا شىقتى. ول يتاليالىق اندجەلو كرەچەنزو مەن فرانتسيالىق ستيەۆەن داكوستانى ارتتا قالدىرعان. دارحاننىڭ ماۋسىم ايىندا شانحاي (قىتاي) مەن مونرەالدا (كانادا) وتكەن پرەمەر- ليگا جانە ا سەرياسى اياسىنداعى تۋرنيردە توپ جارعان بولاتىن. ءاسادىلوۆتىڭ بۇل جەتىستىگى رەيتينگتە كوش باستاۋعا مۇمكىندىك بەردى» ، - دەلىنگەن حابارلامادا.
ەسكە سالا كەتەيىك، كاراتەدەن وليمپيادا ويىندارىنا ليتسەنزيا تاراتاتىن جارىستار تىزبەگى كەلەسى جىلدىڭ مامىرىنا دەيىن جالعاسادى. وليمپيادالىق سالماق دارەجەلەرىندە ۇزدىك تورتتىككە ەنگەن سپورتشىلار توكيو وليمپياداسىنا تىكەلەي جولداما الادى.
