قازاقستاندا «دالا قىرانى» حالىقارالىق وقۋ-جاتتىعۋى اياقتالدى
ءىس-شاراعا ق ر قورعانىس ءمينيسترىنىڭ ورىنباسارى گەنەرال-مايور تيمۋر داندىبايەۆ قاتىستى، دەپ حابارلايدى قازاقپارات ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
سونداي-اق، جابىلۋ راسىمىنە قازاقستان رەسپۋبليكاسىندا اككرەديتتەلگەن اسكەري-ديپلوماتيالىق كورپۋس وكىلدەرى مەن ديپلوماتيالىق ميسسيا باسشىلارى قاتىستى. وقۋ-جاتتىعۋ اياسىندا ۇلى بريتانيا، ءۇندىستان، قىرعىزستان، تاجىكستان، تۇركيا، وزبەكستان جانە امەريكا قۇراما شتاتتارىنان كەلگەن اسكەري قىزمەتشىلەر بىتىمگەرلىك وپەراتسيا ەلەمەنتتەرىن بىرلەسىپ جاسادى.
اتاپ ايتقاندا، بلوك-بەكەتتەردە قىزمەتتەر اتقارۋ، گۋمانيتارلىق جۇكتەردى قاراۋىلداپ الىپ ءجۇرۋ، جەرگىلىكتى تۇرعىندارمەن كەلىسسوزدەر جۇرگىزۋ، توڭىرەكتى پاترۋلدەۋ، مينالانعان دالانى، جولدى زالالسىزداندىرۋ، تازارتۋ جانە سۋمەن قامتاماسىز ەتۋ، سونداي-اق العاشقى مەديتسينالىق كومەك كورسەتۋ بويىنشا تاپسىرمالار ورىندالدى.
وقۋ-جاتتىعۋ 2003-جىلدان بەرى اسكەري قىزمەتشىلەردىڭ بىرلەسكەن تەوريالىق جانە پراكتيكالىق تاپسىرمالاردى ورىنداۋ بارىسىندا العان بىتىمگەرلىك داعدىلارىن جەتىلدىرۋ ماقساتىندا وتكىزىلەدى.
