ارىستاعى كوپقاباتتى ۇيلەردىڭ شاتىرى مەن سىرتقى كورىنىسى بىركەلكى بولۋى كەرەك - اكىم
بۇل تۋرالى ءوڭىر باسشىسى ارىستا وتكەن اپتالىق اپپاراتتىق ماجىلىستە ايتتى، دەپ حابارلايدى قازاقپارات ءتىلشىسى.
ءوڭىر باسشىسى قىسقا مەرزىمدە ارىس قالاسىن قالپىنا كەلتىرۋ، تۇرعىندارعا جاعداي جاساۋ باعىتىنداعى بارلىق ماسەلەنى تالقىلاپ، وسى جاۋاپتى مىندەتتى وتانشىلدىقپەن، جاناشىرلىقپەن اتقارۋ كەرەكتىگىن ايتتى. حالىقتىڭ مۇقتاجىن جەدەل شەشۋ كەرەكتىگىن اتاپ ءوتتى. ءاربىر سەكتوردىڭ جۇمىسىن ءوڭىر اكىمدەرىنىڭ جانە اۋدان، قالا اكىمدەرىنىڭ ورىنباسارلارى جانە ارىس قالاسىنان ءبىر جاۋاپتى وكىل، جالپى سانى 51 ادام ۇيلەستىرەتىن بولدى. جەكە- جەكە شتاب قۇرىپ، ءۇي قۇرىلىسى، گۋمانيتارلىق كومەك تاراتۋ، قاۋىپسىزدىكتى ساقتاۋ، قالانى تازارتۋ، تۇرعىنداردى اقپاراتتاندىرۋ جانە وزگە دە ماسەلەلەر بويىنشا كۇن سايىن مالىمەت بەرىپ وتىرادى دەپ جوسپارلاندى.
اپپارات ماجىلىسىندە شقو، اتىراۋ، قاراعاندى، جامبىل، ماڭعىستاۋ وبلىستارى جانە نۇر-سۇلتان قالاسى اكىمىنىڭ ورىنباسارلارى مەن جاۋاپتى وكىلدەرىنىڭ مالىمەتتەرى تىڭدالدى. «سامۇرىق-قازىنا» ءال-اۋقات قورى مەن «اتامەكەن» ۇلتتىق كاسىپكەرلەر پالاتاسىنىڭ جاۋاپتى وكىلدەرى دە وزدەرىنە تاپسىرىلعان جۇمىستاردىڭ بارىسى تۋرالى باياندادى. اۋدان اكىمدەرىنىڭ ورىنباسارلارى دا وزدەرىنە جۇكتەلگەن اۋماق بويىنشا ەسەپ بەردى.
بۇگىندە ارىس قالاسىنداعى ۇيلەردى تەكسەرۋ، قۇرىلىس نىساندارىنىڭ جوبالىق- سمەتالىق قۇنىن ەسەپتەۋ جۇمىستارى جۇرگىزىلىپ جاتىر. كەي ۇيلەردىڭ تەرەزەلەرى اۋىستىرىلا باستاعان. بارلىق سەكتور بويىنشا ۇيلەردى تەكسەرۋ، اكت تولتىرۋ جۇمىستارى اياقتالۋعا جاقىن. مەردىگەرلەر انىقتالىپ، قۇرىلىس بريگادالارى جاساقتالعان.
وبلىس اكىمى ءومىرزاق شوكەيەۆ قالاداعى كوپقاباتتى ۇيلەردىڭ شاتىرى، سىرتقى كورىنىسى جيناقى ءارى بىركەلكى بولۋ كەرەكتىگىن ەسكەرتتى. ازىق-تۇلىك ۇلەستىرۋ جانە وزگە دە جۇمىستاردى ۇيلەستىرۋگە جەرگىلىكتى بەلسەندى تۇرعىنداردى تارتۋدى تاپسىردى. سونىمەن بىرگە جيىندا قالانى اۋىز سۋمەن، ەلەكتر قۋاتىمەن ۇزدىكسىز قامتۋ، بالالاردى دەمالىس ورىندارىنا جىبەرۋ، ءورت قاۋىپسىزدىگىن ساقتاۋ، اتاۋلى الەۋمەتتىك كومەكتەردى ۋاقتىلى اۋدارۋ ماسەلەلەرى دە تالقىلانىپ، ناقتى جوسپارلار جاسالدى.
