ادامدار نە ءۇشىن شىدامسىز بولىپ بارادى - زەرتتەۋ
«ادامدار سمارتفونداعى قوسىمشا لەزدە اشىلماسا، اشۋلانادى. كاسسادا ۇزاق كۇتۋ كەرەك بولعان سوڭ دۇكەنگە بارۋدان باس تارتادى. ەسكى فيلمدەردى كورگىسى كەلمەيدى. سەبەبى سيۋجەتتىڭ تىم باياۋ جۇرەتىنىن ۇناتپايدى. ادامدار راسىمەن، شىدامسىز بولىپ بارا ما؟»، - دەيدى ماقالا اۆتورى لورا بەلو.
ونىڭ پايىمىنشا، ادامداردىڭ شىدامسىزدىعىنىڭ ارتۋى بىرنەشە عاسىر بويى جۇرگەن ەۆوليۋتسيا ناتيجەسى. دەگەنمەن، سوڭعى ونجىلدىقتا قارجى نارىعىنىڭ ونىمدىلىككە اسەرى، سونىمەن قاتار سيفرلىق تەحنولوگيالاردى پايدالانۋ بۇل تەندەنتسيانى ارتتىرا تۇسكەن.
«شىدامسىزدىق - جىلدامدىق يدەياسىمەن باسقارىلاتىن الەۋمەتتىك ءومىر ناتيجەسى. قازىرگى تاڭدا ادام كۇندەلىكتى قابىلدايتىن اقپارات لەگى اناعۇرلىم كوبەيگەن. سول سەبەپتى بىزگە ۋاقىت جەتپەيتىندەي كورىنەدى»، - دەيدى ول.
«بۇگىنگى تاڭدا ءيىسسۋ تۇتىنۋشى نازارىن اۋلاۋ ءۇشىن جارتى مينۋت قاجەت ەتىلەدى. ال 1980 -جىلدارى ءيىسسۋ تاڭداۋ ءۇشىن ون مينۋت قاجەت بولاتىن»، - دەيدى ماركەتولوگ ماماندار. اتاپ وتىلگەندەي، وسى شىدامسىزدىقتى بىلگەندىكتەن ماماندار ءيىسسۋلارعا جىلدامىراق ارەكەت ەتۋگە يتەرمەلەيتىن جەمىس نەمەسە ءتاتتى يىستەردى كوپتەپ پايدالانادى.
«ادامداردىڭ قارىم-قاتىناسىنا كەلەر بولساق، ينتەرنەتتىڭ، ودان كەيىن الەۋمەتتىك جەلى مەن سمارتفونداردىڭ بىرىنەن كەيىن ءبىرى پايدا بولۋى سيفرلىق قۇرالدارعا قولى جەتىمدى ادامداردىڭ ءومىرىن تۇبەگەيلى وزگەرتتى. مىسالى، امەريكالىق جەلىدە العاشقى (SMS) حابارلاما 1992 -جىلى جىبەرىلدى. ال 2019 -جىلى جاڭا جىل قارساڭىندا 60 سەكۋندا الەم بويىنشا 41,6 ميلليون حابارلاما جىبەرىلگەن. بۇعان ارينە، WhatsApp ،Facebook Messenger ،WeChat سەكىلدى قوسىمشالاردىڭ اسەرى مول، - دەپ جازادى اۆتور.
اقپاراتقا سايكەس، ون ادامنىڭ سەگىزى ويانا سالا سمارتفونىنا كوز تاستايدى.
«قازىرگى تاڭدا ادامزات تەرەڭ وزگەرىستەر كەزەڭىن باستان وتكەرىپ جاتىر. دامىعان ەلدەردە ۇلكەندەر دە، جاسوسپىرىمدەر مەن بالالار دا از ۇيىقتايتىن بولعان»، - دەيدى الەۋمەتتانۋشىلار. ال پسيحياتر پاتريس حەررەنىڭ ايتۋىنشا، اتا-انانىڭ شىدامسىزدىعى بالالارعا بەرىلىپ جاتىر.
«بۇل جاعدايلاردىڭ بارلىعى ادام نازارىن بۇزادى. ادامدار ءار نارسەگە از ۋاقىتتان بولەتىندىكتەن، جىلدام ارەكەت ەتۋ كەرەك دەپ ويلايدى»، - دەيدى نەيروبيولوگ جان-فيليپپ لاشو.
ونىڭ ايتۋىنشا، تابيعات جىلدامدىعىنا ساي ۋاقىت پەن قارجى جانە تەحنولوگيالىق ۋاقىت اراسىندا بالانس بولۋى كەرەك. ءبىراق ادامدار كىتاپ وقىپ، جاي سەرۋەندەپ، قۇر اسپانعا قاراۋ، ياعني وزىنە ۋاقىت ءبولۋدى ازايتىپ جاتىر.
