ارىس جارىلعىش زاتتاردان تولىق تازارتىلدى - قورعانىس مينيسترلىگى

بۇل تۋرالى قازاقپارات ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.

«قورعانىس ءمينيسترى نۇرلان ەرمەكبايەۆ تۇركىستان وبلىسىنىڭ اكىمى ءومىرزاق شوكەيەۆپەن بىرگە قالانىڭ 17 سەكتورىنداعى جەدەل شتابتاردى ارالاپ، حالىقتىڭ سۇراقتارىنا جاۋاپ بەردى. جارىلۋ قاۋپى بار زاتتاردان جاپپاي تازارتۋ ءۇشىن ارىس اۋماعى 17 سەكتورعا بولىنگەن. تاڭعى ساعات 05.00 دە تازارتىلعان ۋچاسكەلەرگە باقىلاۋ جۇرگىزىلدى. اۋماقتى تازالاۋ اياقتالعان سوڭ ارىس-1 جانە ارىس-2 ستانسىلارىنان بارلىق باعىتتاعى پويىزداردىڭ قوزعالىسى قالپىنا كەلتىرىلدى»، - دەلىنگەن مينيسترلىكتىڭ حابارلاماسىندا.

باسپا ءسوز قىزمەتىنىڭ مالىمەتىنە سۇيەنسەك، ق ر قارۋلى كۇشتەرىنىڭ رادياتسيالىق، حيميالىق جانە بيولوگيالىق بارلاۋ توپتارى قالانىڭ رادياتسيالىق، بيولوگيالىق جاعدايىنا تولىق مونيتورينگ جۇرگىزگەن.

رادياتسيالىق فوندى ولشەۋ كەزىندە ۋلى جانە كەرى اسەر ەتەتىن زاتتار تابىلماعان.

«دەگەنمەن، قالا اۋماعىندا ساپەرلەر جاساعى ءالى بولادى سونداي-اق اۋەدەن تۇراقتى باقىلاۋ ورناتىلىپ، اسكەري قويما اۋماعى مەن وعان ىرگەلەس جەرلەرگە مونيتورينگ جۇرگىزىلەدى. ولاردان جەتكەن اقپارات جەدەل شتابقا ءتۇسىپ وتىرادى. ەندى قارۋلى كۇشتەردىڭ جەكە قۇرامى ارىس تۇرعىندارىنا ءوز ۇيلەرىنە قايتا ورالۋعا كومەكتەسەدى. اسكەري پسيحولوگتار دا ەلمەن جۇمىس ىستەپ، كونسۋلتاتسيالار وتكىزەدى»، - دەلىنگەن باسپا ءسوز مالىمەتىندە.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى