ديماش قۇدايبەرگەننىڭ كونسەرتىنە تىڭدارماندار قانشا ەلدەن كەلەدى
وسى تۇرعىدا كونسەرتكە دايىندىق بارىسىمەن قازاقپارات ءتىلشىسى تانىسىپ كەلگەن بولاتىن.
«ءبىز قازىر سوڭعى دايىندىق جۇمىستارىن جۇرگىزىپ جاتىرمىز. كونسەرتتىڭ جوعارى دەڭگەيدە ءوتۋى ءۇشىن كوپتەگەن ماماندار ەڭبەك ەتۋدە. ءبارى دە ويداعىداي وتەدى دەگەن نيەتتەمىن. كونسەرتتىڭ باستى ەرەكشەلىگى - ونىڭ ءوز وتانىمدا ءوتۋى. ال ونىڭ بارىسىنا كەلسەك، جانكۇيەرلەرىم بىلەدى - مەن ورىنداماي جاتىپ، بىلاي جاسايمىن دەپ الدىن الا ايتقاندى ۇناتا بەرمەيمىن. ايتارىم - جەكە كونسەرتىمدە كوپتەگەن جاڭا اندەردى ورىندايمىن»، - دەدى د. قۇدايبەرگەن.
ونىڭ ايتۋىنشا، جاڭا اندەردىڭ دەنى قازاق تىلىندە جازىلعان.
«انا تىلىمىزدەگى اندەردەن بولەك، امەريكالىق جانە ەۋروپالىق كومپوزيتورلاردىڭ مەن ءۇشىن ارنايى جازعان اندەرىن ورىندايمىن. جانە ءاربىر قويىلىمدا ءبىر-بىرىنە ۇقسامايتىن وزىندىك ەرەكشە ەتيۋدتەر بولادى. ياعني ءاربىر انگە جەكەلەگەن ايرىقشا قويىلىم جاسالۋدا»، - دەدى ول.
سونداي-اق، ءانشى كونسەرت دايىندىعىنا 500 دەن استام جوعارى كاسىبي مامان تارتىلعانىن جانە كەش ءۇشىن ارنايى 150 ساحنالىق كوستيۋم تىگىلگەنىن تىلگە تيەك ەتتى.
«جوعارى دەڭگەيدەگى قويىلىمدىق نومىرلەر ءۇشىن بالەت ترۋپپاسىنا حالىقارالىق الاڭداردا ونەر كورسەتىپ جۇرگەن ەلىمىزدىڭ ەڭ ۇزدىك بيشىلەرى مەن اكروباتتارى تارتىلدى. ونىڭ ىشىندە، «Notre dame de Paris» ميۋزيكلىنىڭ ارتىستەرى، «تانسى نا تنت» جوباسىنىڭ قاتىسۋشىلارى جانە باتۋتتىق گيمناستيكا بويىنشا سپورت شەبەرلەرى بار»، - دەدى د. قۇدايبەرگەن.
ايتا كەتەيىك، د. قۇدايبەرگەننىڭ «ارناۋ» اتتى جەكە كونسەرتى 29 -ماۋسىم كۇنى ەلورداداعى «استانا ارەنا» ستاديونىندا وتەدى. ال تەلەكورەرمەندەر ءۇشىن 6 -شىلدە كۇنى «استانا كۇنى» مەرەكەسىنە وراي «Qazaqstan» ۇلتتىق ارناسىنان كورسەتىلەدى.
كونسەرت ۇيىمداستىرۋشىلارىنىڭ ايتۋىنشا، كەش بيلەتتەرىن الەمنىڭ 64 ەلىنەن 10 مىڭعا جۋىق تىڭدارمان ساتىپ العان. ونىڭ ىشىندە ا ق ش، ۇلى بريتانيا، برازيليا، مەكسيكا، كانادا، اۆستراليا، شۆەيتساريا، مالايزيا، سينگاپۋر، افريكا، ەگيپەت، يزرايل جانە ماروككو سىندى الىس مەملەكەتتەردىڭ تىڭدارماندارى بار.
