ارىستاعى اپات ەڭ الدىمەن ادامشىلىق پەن ىنتىماقتى كورسەتتى - داۋرەن ابايەۆ
«ەڭ الدىمەن، مەن ارىستا قازا تاپقان ازاماتتاردىڭ وتباسىلارىنا قايعىرىپ كوڭىل ايتقىم كەلەدى. بۇكىل حالىق سىزدەرمەن بىرگە قايعى جامىلدى. تۇركىستان وبلىسىنىڭ اكىمدىگى مەن قورعانىس مينيسترلىگى بىردەن بولعان وقيعا تۋرالى حابار تاراتىپ وتىردى. بىرنەشە ساعاتتىڭ ىشىندە جەرگىلىكتى حالىقتى ەۆاكۋاتسيالاۋ بويىنشا اۋقىمدى كامپانيا جۇرگىزىلدى. 15 ەۆاكۋاتسيالىق پۋنكت اشىلىپ، شۇعىل جەلى ىسكە قوسىلدى. سول كۇنى ارىسقا پرەزيدەنت ۇشىپ باردى. قازىرگى ۋاقىتتا ەل باسشىلىعى ايماقتا بولعان جايدى تولىعىمەن باقىلاۋىندا ۇستاپ وتىر»، - دەدى داۋرەن ابايەۆ «حابار» ارناسىنداعى «اشىق ديالوگ» باعدارلاماسىندا.
مينيستر «بۇعان كىم كىنالى؟» دەگەن سۇراقتى بيلىك تاراپى ۇمىت قالدىرمايتىنىن جەتكىزدى.
«سوندىقتان، بولعان وقيعا بارىنشا زەرتتەلىپ، ونىڭ سەبەبى انىقتالادى. ءسوزسىز، بيلىك بەيبىت زاماندا وق-دارىلەر قويماسىنداعى جارىلىسقا جول بەرىلمەۋى كەرەكتىگىن جاقسى ۇعىنىپ وتىر. ءبىراق، مۇنداي جاعداي ءبىزدىڭ ەلدە عانا بولىپ جاتقان جوق. ا ق ش-تى ەسكە الىڭىز. پەنسيلۆانيا شتاتىندا ءبىر جىل بۇرىن وق-دارىلەر قويماسىندا جارىلىس بولىپ، ءبىر ادام قازا تاۋىپ، تورتەۋى جارالانعان بولاتىن. وتكەن جىلدىڭ 10 -تامىزىندا سولسبەري قالاسىندا اسكەري قۇرىلعىلار زاۋىتىندا جارىلىس بولىپ، ءبىر ادام كوز جۇمىپ، ءبىر ادام قاتتى جارالانعان ەدى. مۇنداي مىسالدار كوپ. الايدا بۇل اقتالۋ ەمەس. سەبەپ ءارتۇرلى بولۋى مۇمكىن. سوندىقتان، قانداي دا ءبىر شەشىم شىعارۋعا ءالى ەرتە. ءبىراق، كىنالىلەر جازالانىپ، زالالدىڭ قالپىنا كەلتىرىلەتىنىن ايتقىم كەلەدى. ەڭ الدىمەن، حالىققا بارلىق قاجەتتى كومەك كورسەتىلەدى»، - دەدى ول.
داۋرەن ابايەۆ بۇل جەردە مەكتەپ نەمەسە بيزنەس-ورتالىق ەمەس، 45 مىڭ ادام تۇراتىن تولىقتاي ءبىر ەلدى مەكەنگە ەۆاكۋاتسيالاۋ جۇمىسى جۇرگىزىلگەنىن دە ەسكەرۋ كەرەكتىگىن اتاپ ءوتتى.
«جارىلىس بارىسىندا حالىقتىڭ ءبىر بولىگى وندىرىستە، ەكىنشىسى ەگىندە جۇرگەن. بىرەۋى ۇيدە، بىرەۋى مەكتەپتە بولعان. جارىلىس اياق استىنان بولدى. دەسە دە، جاعدايدى رەتتەۋگە مۇمكىندىك تۋدى»، - دەدى ول.
مينيستر ءوز سوزىندە «سول كۇنى بەنزين ارىستا ادەيى قىمباتتاپ كەتكەنى راس پا؟» دەگەن سۇراققا جاۋاپ بەردى.
«بىرنەشە جاعداي بولعان شىعار. ءبىراق ولار ءبىرلى-جارىم عانا. ءبىرلى-جارىم جاعداي ءۇشىن ءبارىن كىنالاۋعا بولمايدى. كوپ جاعدايدا ادامدار ءبىر-بىرىنە كومەكتەسىپ، تەگىن جەتكىزىپ تاستاۋدى ۇسىنعان. زارداپ شەككەندەردى ۇيىنە ورنالاستىردى. جالپى، ارىستاعى تراگەديا - ەڭ الدىمەن ادامشىلىقتى، ىنتىماقتى، ءبىزدىڭ ازاماتتاردىڭ قيىن كەزەڭدە كومەكتەسۋگە دايار ەكەنىن كورسەتتى. ەرلىكتىڭ قانشاماسى كادردىڭ سىرتىندا قالدى. ءورت سوندىرۋشىلەر ءوز جانىن شۇبەرەككە ءتۇيىپ، قيىن جاعدايدا ادامداردى ءقاۋىپسىز جەرگەن كوشىردى. ولار جارىلىپ جاتقان سناريادتىڭ جانىندا ءتىلسىز جاۋمەن الىستى. قۇقىق قورعاۋ ورگاندارى سول كۇنگى ۇرلىقتاردى تىيدى. ەلدەگى ەرىكتىلەردىڭ ەرلىگىنىڭ ءوزى نەگە تۇرادى؟ بيزنەسمەندەردەن باستاپ قاراپايىم ازاماتتارعا دەيىن - ءبارى دە ءبىر كىسىدەي كومەك جينادى. ەل دەگەندە ەزىلىپ، جۇرت دەگەندە جۇمىلۋ دەگەن وسى»، - دەدى داۋرەن ابايەۆ.
ەسكە سالا كەتسەك، بۇگىن تۇركىستان وبلىسىنىڭ اكىمى ءومىرزاق شوكەيەۆ حالىقتىڭ الدىنا شىعىپ، ارىس حالقى ەرتەڭنەن، ياعني 27 -ماۋسىمنان باستاپ ۇيلەرىنە قايتا الاتىنىن ءمالىم ەتكەن بولاتىن.
