مۇگەدەك بالاسى بار جالعىزباستى انا: ءبىز سەكىلدىلەردىڭ كوبى نەسيەنى ءماجبۇرلى تۇردە العاندار
ويتكەنى، ءبىز سەكىلدىلەردىڭ كوبى نەسيەنى ءماجبۇرلى تۇردە العاندار. ق ر پرەزيدەنتىنىڭ جارلىعىنا قاتىستى پىكىر بىلدىرگەن مۇگەدەك بالا اسىراپ وتىرعان جالعىزباستى انا، قاراعاندىلىق جانار مارات قىزى وسىلاي ايتتى، دەپ حابارلايدى قازاقپارات.
«مەن مۇگەدەك بالا اسىراپ وتىرعان جالعىز باستى انامىن. بالام دياستىڭ جاسى ءقازىر ون التىدا. بالالار تسەرەبرالدى سال اۋرۋىمەن بالا كەزىنەن اۋىرادى. مەملەكەت بەرەتىن جاردەماقىمەن كۇن كورىپ وتىرمىز. پاتەر جالداپ تۇرامىز. اي سايىن كوممۋنالدىق تولەم، پاتەر اقىسىن تولەگەن سوڭ، قالعان اقشا بالامنىڭ ءدارى-دارمەگىنە، كيىم-كەشەگى مەن باسقا دا قاجەتتىلىكتەرىنە جەتپەيدى. سوندىقتان كەيدە پايىزى ۇلكەن بولسا دا، بانكتەن نەسيە الۋعا ءماجبۇر بولامىز. قانشاما وتباسى نەسيەلەرىن تولەي الماي قينالىپ جۇرگەندەرىن بىلەمىن. پرەزيدەنتتىڭ بۇل جارلىعى وسىنداي قينالىپ جۇرگەن وتباسىلارعا قۋانىش سىيلادى دەپ ويلايمىن. ول دا بولسا ۇلكەن كومەك»، دەيدى جانار مارات قىزى.
ول ءوزىنىڭ ون جىلدان استام ۋاقىت بويى پاتەر كەزەگىندە تۇرعانىن ايتادى. «الايدا ونى دا الۋ ءۇشىن باستاپقى جارنا قاجەت. جاڭا ايتىپ وتكەنىمدەي، بىزدە ونداي مۇمكىندىك جوق. نەگە مۇگەدەك بالا اسىراپ وتىرعان انالارعا باستاپقى جارناسىز پاتەر بەرىلمەيدى نەمەسە قانداي دا ءبىر جەڭىلدىك جاسالمايدى؟ ەندى جاڭا پرەزيدەنتىمىز وسى جاعىن دا قاراستىرسا دەيمىن»، - دەپ ءوز ءوتىنىشىن جەتكىزدى جانار مارات قىزى.
