جوعارعى سوت ءتوراعاسى بىلىكتى زاڭگەرلەردىڭ سۋديا بولۋعا نەلىكتەن تالپىنبايتىنىن ايتتى
جوعارعى سوت ءتوراعاسى جاقىپ اسانوۆ ق ر پرەزيدەنتى جانىنداعى ادام قۇقىقتارى جونىندەگى كوميسسيانىڭ كەڭەيتىلگەن ماجىلىسىندە وسىلاي ءمالىم ەتتى، دەپ حابارلايدى قازاقپارات ءتىلشىسى.
سوت جۇيەسىندەگى كادرلىق رەفورمالارعا توقتالعان جاقىپ اسانوۆ 2017 -جىلى قازاقستان كولەمىندە سۋديالاردىڭ قىزمەتتەن ءوز ەركىمەن كەتۋ كورسەتكىشى بويىنشا تاريحتا بولماعان ستاتيستيكا تىركەلگەنىن ەسكە الدى.
«2017 -جىلى سۋديالاردىڭ ءوز ەركىمەن قىزمەتتەن كەتۋى جيىلەگەن بولاتىن. قازاقستان سوت جۇيەسىنىڭ تاريحىندا بۇرىن-سوڭدى ونداي ستاتيستيكا تىركەلمەپتى. ونىڭ سەبەبى كوپ. مىسالى، ءبىر سۋديا كۇنىنە 10 شەشىم قابىلداۋى كەرەك. ياعني، سۋديانىڭ وتباسىنا كوڭىل بولۋىنە مۇلدە مۇمكىندىگى جوق. سول ءۇشىن ولاردىڭ جۇكتەمەسىن ازايتۋ بويىنشا زاڭعا وزگەرىستەر ەنگىزدىك. جىل باسىنان بەرى سوت ىسىنە قاتىستى 16 زاڭدى جاڭارتۋدى قولعا الدىق. قازىر ونىڭ التاۋى قولدانىستا. 7 قۇجات پارلامەنت قاراۋىندا جاتسا، 3 قۇجات مەملەكەتتىك ورگانداردىڭ ماقۇلداۋىن كۇتۋدە»، - دەيدى جوعارعى سوت ءتوراعاسى.
ءوز سوزىندە جاقىپ اسانوۆ بىلىكتى زاڭگەرلەردىڭ سۋديا بولۋعا قۇلىقسىز ەكەنىن دە ايتتى.
«سۋديا بولۋعا بىلىكتى ماماندار قۇلىقسىز. ويتكەنى سۋديا بولۋدىڭ قيىندىعىن بىلەدى. الەۋمەتتىك تۇرعىدا دۇرىس قورعالماعان بۇعان دەيىن جۇكتەمەسى اۋىر ەدى. كارەرالىق ءوسۋ، باسشىلىققا تاعايىنداۋ، جاقسى قالالارعا اۋىسۋ پروتسەستەرىندە ادىلدىك از بولدى. سوڭعى 10 جىلدا سۋديالاردىڭ جۇكتەمەسى ۇدايى ارتىپ كەلگەن. بىلتىر عانا ازايدى. سونىڭ ارقاسىندا بيىل سۋديا بولۋعا نيەتتىلەردىڭ سانى 2 ەسەگە ءوسىپ، ەڭ باستىسى بىلىكتى سۋديالاردىڭ ءوز ەركىمەن كەتۋى توقتادى»، - دەدى ول.
ايتا كەتسەك، بيىل جىل سوڭىنا قاراي قىزمەت بابىنداعى سۋديالاردىڭ لاۋازىمىنا قانشالىقتى لايىقتى ەكەنىن تەكسەرۋ باستالادى.
ەسكە سالساق، مەملەكەت باسشىسى قاسىم-جومارت توقايەۆ جوعارعى سوت ءتوراعاسى جاقىپ اسانوۆقا سوت جۇيەسىن جەتىلدىرۋ جۇمىستارىن جالعاستىرۋدى تاپسىرعان بولاتىن.
الداعى 2,5 جىلدىڭ ىشىندە سوت جۇيەسى لايىق ەمەس كادرلاردان تولىق تازارتىلماق.
