ەلوردادان ارىسقا «قامقورلىق» كەرۋەنى جونەلتىلدى
كومەك كەرۋەنى بايتەرەك مونۋمەنتىنىڭ جانىنان جولعا شىقتى. ارىستىقتاردى قولداۋ ماقساتىنداعى ايتۋلى شاراعا رەسەيلىك «مۋز-ت ۆ» ارناسىنىڭ ديرەكتورى ارمان داۋلەتياروۆ، وتاندىق ەسترادا جۇلدىزدارى مايرا ءىلياسوۆا، ساكەن مايعازيەۆ، باۋىرجان يسايەۆ، ەرنار سادىرباي، اعايىندى جۇگىنىسوۆتەر، اكتەر ءادىل احمەتوۆ كەلدى.
مادەنيەت جانە سپورت مينيسترلىگىنىڭ باسپا ءسوز حاتشىسى ايدار قىرىقباي ۇلىنىڭ ايتۋىنا قاراعاندا، كومەك كەرۋەنىن بىرنەشە مەكەمە جاساقتاعان. اتاپ ايتقاندا، ق. مۇڭايتپاسوۆ اتىنداعى مەكتەپ- ينتەرناتى، «قازرەستاۆراتسيا» مەكەمەسى مەن «قازاقكونسەرت» مەملەكەتتىك كونسەرتتىك ۇيىمى، ش. شاياحمەتوۆ اتىنداعى «ءتىل- قازىنا» ۇلتتىق ورتالىعى، «استانا وپەرا» تەاتر جانە بالەت تەاترى، ۇلتتىق اكادەميالىق كىتاپحانا، ل. گۋميلەۆ اتىنداعى ە ۇ ۋ مەن «قازاق تۋريزم» كومپانياسىنىڭ قىزمەتكەرلەرى كەرۋەن جاساقتاپ، ارىسقا ازىق-تۇلىكتەر مەن تاۋارلاردى جونەلتتى.
«ارىستا بولعان جاعدايعا بايلانىستى مادەنيەت جانە سپورت مينيستر اقتوتى رايىمقۇلوۆانىڭ باستاماسىمەن ءبىزدىڭ ۆەدومستۆوعا قاراستى ونەر وشاقتارىنىڭ باسشىلارى، ونەر ادامدارى جۇمىلىپ، ارىس حالقىن رۋحاني قولداۋ ماقساتىندا شىمكەنتكە كەتكەنىن بىلەسىزدەر. مۇنداعى ماقسات - ءان ايتۋ نەمەسە بي بيلەۋ، تۇرعىندار رۋحاني تۇرعىدا قولداۋ ەكەنىن اتاپ ءوتۋ كەرەك. انشىلەر ءوز قالتالارىنان 16 ميلليون تەڭگە جيناپ، ارىسقا كومەكتەسۋگە ارنالعان شوتقا اۋداردى. مادەنيەت جانە سپورت مينيسترلىگى قىزمەتكەرلەرى ءبىر كۇندىك جالاقىسىن بەردى. ودان بولەك، ەكى قالادا كومەك شتابىن قۇردى. سول شتابتىڭ جۇمىلدىرۋىمەن 2 قالاداعى 3 شتابتان 15 توننا كۇرىش، 10 توننا ۇن، ماكارون ونىمدەرى، ءدارى-دارمەك، ماتراس، جاستىق، كورپە، كيىم- كەشەك جينالدى. ءبارى دە جينالعان سوماعا ساتىپ الىندى»، - دەدى ايدار قىرىقباي ۇلى.
ارىستىقتارعا قولداۋ ءبىلدىرۋ شاراسىندا ماسكەۋدەن ارنايى ۇشىپ كەلگەن مۋز-ت ۆ» ارناسىنىڭ ديرەكتورى ارمان داۋلەتياروۆ تا ءسوز سويلەدى. ونىڭ ايتۋىنشا، ارىستاعى قايعى - بارىنە ورتاق.
«ۇشاقتان جاڭا ۇشىپ كەلدىم. ارىستاعى وقيعا ءبىزدىڭ ورتاق قايعىمىز. قازاق بولعاندىقتان ەمەس، قاراپايىم ادام رەتىندە ارىستىقتاردىڭ قايعىسىن بولىسكىمىز كەلەدى. ءوز تاراپىمىزدان كومەك بەردىك. ەشبىر جەردە مۇنداي قايعى بولماسىن»، - دەدى ارمان داۋلەتياروۆ.
ءوز كەزەگىندە «قازاقكونسەرت» مەملەكەتتىك كونسەرتتىك ۇيىمىنىڭ ديرەكتورى جەڭىس سەيدۋللا ۇلى جۇمىلا كوتەرگەن جۇك جەڭىل ەكەنىن اتاپ ءوتتى.
«وسىنداي كەزدە ق ر مادەنيەت جانە سپورت مينيسترلىگىنە قاراستى ونەر وشاقتارىنىڭ اتىنان قولىمىزدان كەلگەنشە كومەك بەرىپ جاتىرمىز. سول جاقتاعى ادامدار جالعىزبىز دەپ ويلاماسىن. بولىسسەڭ عانا قايعى ازايادى»، - دەدى جەڭىس سەيدۋللا ۇلى.
