كەزدەيسوق زاڭگەرلەر ءۇشىن سوت جۇيەسىنە جول جابىلدى - جوعارعى سوت ءتوراعاسى
بۇل تۋرالى جوعارعى سوت ءتوراعاسى جاقىپ اسانوۆ ق ر پرەزيدەنتى جانىنداعى ادام قۇقىقتارى جونىندەگى كوميسسيانىڭ كەڭەيتىلگەن ماجىلىسىندە ايتتى.
«كوميسسيانىڭ جوعارعى سوتتا ءوتۋى تەگىن ەمەس. ادامداردىڭ قۇقىعىن قورعاۋ - سوت جۇيەسىنىڭ ەڭ نەگىزگى مىندەتى. سوت پروتسەستەرىنە قاتىسۋشى تاراپتارعا جاعداي جاساۋ بويىنشا كوپتەگەن وزگەرىستەر جاسالىپ جاتىر»، - دەگەن جوعارعى سوتتىڭ ءتوراعاسى جاقىپ اسانوۆ بۇگىندە سوت جۇيەسىنە ساپالى مامان ىرىكتەۋ رەفورماسىنىڭ ەكىنشى كەزەڭى باستالعانىن اتادى.
«بۇعان دەيىن قىزمەتكە كىرىسۋشى سۋديالاردى جاڭا تالاپ بويىنشا قابىلدادىق. مەنىڭ جەكە پىكىرىم بويىنشا، ءقازىر سوت جۇيەسىندە كارەرالىق ءوسۋ پروتسەسى ءادىل ءوتىپ جاتىر. ونى ءبىر عانا دۇنيەدەن بايقاۋعا بولادى. سوڭعى كەزدە ماعان ەشكىم ونداي ماسەلەمەن ءوتىنىش ايتپايتىن بولدى. ويتكەنى، مەنىڭ قولىمنان بىرەۋدى سۋديا ەتىپ تاعايىنداۋ نەمەسە قىزمەتتە ءوسىرۋ كەلمەيدى. بارلىعىن ارنايى جاساقتالعان كوميسسيا شەشەدى. ءقازىر كەزدەيسوق زاڭگەرلەر ءۇشىن سوت جۇيەسىنە جول جابىلدى دەپ سەنىممەن ايتا الامىن. ەندىگى ماسەلە قىزمەت بابىنداعى سۋديالاردىڭ ساپاسىنا قاتىستى بولىپ تۇر. جۇيەدەگى سۋديالاردى وسى جىلدىڭ اياعىنان باستاپ تەكسەرە باستايمىز. مۇندا دا وزىق مەملەكەتتەردىڭ تاجىريبەسىنە نەگىزدەلگەن ەرەجە بەكىتىلەدى. تەكسەرۋدىڭ ءادىل ءوتۋىن قاداعالايتىن كوميسسيا قۇرىلدى. ونىڭ جۇمىسىنا مەن ارالاسا المايمىن. باسقا دا ارىپتەستەرىمنىڭ ارالاسپاۋىن تالاپ ەتەمىن. وسىلايشا ەكى جىلدىڭ ىشىندە جۇيەدەگى سۋديالاردىڭ قىزمەتىنە تولىق باعا بەرىلەتىن بولادى»، - دەدى جاقىپ اسانوۆ.
ەسكە سالساق، مەملەكەت باسشىسى قاسىم- جومارت توقايەۆ جوعارعى سوت ءتوراعاسى جاقىپ اسانوۆقا سوت جۇيەسىن جەتىلدىرۋ جۇمىستارىن جالعاستىرۋدى تاپسىرعان بولاتىن.
الداعى 2,5 جىلدىڭ ىشىندە سوت جۇيەسى لايىق ەمەس كادرلاردان تولىق تازارتىلماق.
