ازاماتتاردىڭ نەسيەسىن جابۋ پروتسەدۋراسى قاشان باستالادى؟
بۇل جونىندە ۇكىمەتتىڭ باسپا ءسوز ورتالىعىندا ق ر پرەمەر-ءمينيستردىڭ ورىنباسارى - قارجى ءمينيسترى ءاليحان سمايىلوۆ ايتىپ بەردى، دەپ حابارلايدى قازاقپارات ءتىلشىسى.
«ءبىز بۇل جۇمىستى قازىردىڭ وزىندە باستاپ كەتتىك. بانكتەردەگى ءتىزىمدى ايقىنداۋ، الەۋمەتتىك قامسىزداندىرۋ ورگاندارىنىڭ تىزىمىمەن سالىستىرۋ جۇمىستارى باستالدى. بارلىق ساناتتاعى ازاماتتاردىڭ ءتىزىمىن بانك مەكەمەلەرىنىڭ مالىمەتتەرىمەن سالىستىرىپ جاتىرمىز. سەبەبى، ناقتى ساناتتاعى ازاماتتاردىڭ قارىزىن وتەيتىنىمىزدى ءبىلۋىمىز كەرەك»، - دەدى ءاليحان سمايىلوۆ.
ءمينيستردىڭ ايتۋىنشا، شىلدە ايىندا قارىزدى وتەۋگە بايلانىستى قاراجاتتى پىسىقتاۋ جۇمىسى پارلامەنتتە قارالادى.
«ءبىز قازىرگى ۋاقىتتا رەسپۋبليكالىق بيۋدجەتتەن بولىنەتىن 88 ميلليارد تەڭگەگە قوسىمشا 17 ميلليارد تەڭگە قوسۋ ءۇشىن پروبلەمالىق نەسيەلەر قورىنىڭ وبليگاتسيالارىن شىعارعالى جاتىرمىز. پارلامەنتتەن وتكەننەن كەيىن ايقىنداۋ، پىسىقتاۋ جۇمىستارىن 10- شىلدەدە اياقتاپ، بىردەن نەسيەنى جابۋ بويىنشا جۇمىستى باستاپ كەتەمىز. جالپى، جۇمىستى الداعى 2 ايدا بىتىرەمىز»، - دەدى ءاليحان سمايىلوۆ.
ايتا كەتسەك، كەشە ق ر پرەزيدەنتى قاسىم-جومارت توقايەۆ «قازاقستان رەسپۋبليكاسى ازاماتتارىنىڭ قارىز جۇكتەمەسىن ازايتۋ تۋرالى» جارلىققا قول قويعان بولاتىن.
