شەتەلدىكتەردى جۇمىسقا تارتۋعا ارنالعان كۆوتاعا وزگەرىس ەنگىزىلەدى
بۇل تۋرالى پارلامەنت ماجىلىسىندە كوشى-قون پروتسەستەرىن رەتتەۋ ماسەلەلەرى بويىنشا وزگەرىستەر ەنگىزۋ تۋرالى زاڭ جوباسى تانىستىرۋ بارىسىندا ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ءاقمادي سارباسوۆ ءمالىم ەتتى، دەپ حابارلايدى قازاقپارات ءتىلشىسى.
ونىڭ سوزىنە قاراعاندا، سىرتقى ەڭبەك كوشى-قونى سالاسىنداعى زاڭناما ءتيىستى وزگەرىستەر مەن تولىقتىرۋلارعا اسەر ەتتى.
«بىرىنشىدەن، ەل ەكونوميكاسىنا شەتەل ينۆەستيتسيالارىن تارتۋ پروتسەسىنە جۇمىلدىرىلعان جۇمىس بەرۋشىلەر مەن ينۆەستورلاردىڭ قاجەتتىلىگىنە جەدەل دەن قويۋ ءۇشىن، ۇكىمەتتىڭ شەتەلدىك جۇمىس كۇشىن (ش ج ك) تارتۋعا ارنالعان كۆوتانى بەلگىلەۋ جونىندەگى فۋنكتسيالارىن حالىقتى جۇمىسپەن قامتۋ ماسەلەلەرى جونىندەگى ۋاكىلەتتى ورگانعا بەرۋ ۇسىنىلادى. ەكىنشىدەن، ەكونوميكالىق قىزمەت تۇرلەرىن الىپ تاستاپ، شەتەلدىك جۇمىس كۇشىن تارتۋعا كۆوتالاردى بەلگىلەۋ كەزىندە ساناتتار بويىنشا ءبولۋ ۇسىنىلادى»، - دەدى ۆيتسە-مينيستر.
ۇشىنشىدەن، شەتەلدىك جۇمىس كۇشىن تارتۋ ءراسىمىن جەتىلدىرۋ جانە ينۆەستورلار ءۇشىن قولايلى جاعدايلار جاساۋ ماقساتىندا شەتەلدىك جۇمىس كۇشىن تارتۋعا رۇقساتتىڭ ارەكەتىن باسقا اكىمشىلىك-اۋماقتىق بىرلىكتەرگە تاراتۋ كوزدەلىپ وتىر.
بۇل رەتتە جۇمىس بەرۋشى رۇقساتتا كورسەتىلگەن ءاربىر ءوڭىردىڭ بيۋجەتىنە سالىق الىمىن تولەۋگە، سونداي-اق ءتيىستى وڭىرلەردە جۇمىستاردى ورىنداۋ جانە قىزمەتتەردى كورسەتۋ تۋرالى شارتى بولۋعا ءتيىس.
«تورتىنشىدەن، قولدانىستاعى زاڭناماعا سايكەس، ءبىزدىڭ مينيسترلىك ارقىلى بەرىلەتىن بىلىكتىلىگىنىڭ سايكەستىگى تۋرالى انىقتاماسى بويىنشا جوعارى بىلىكتى شەتەلدىكتەر ءوز بەتىنشە جۇمىسقا ورنالاسا الادى. سوڭعى 3 جىلدا بارلىعى 11 ادام ءوتىنىش ءبىلدىرىپ، ءتيىستى انىقتامالار العان. وسىعان بايلانىستى، بۇل قۇزىرەتتى جەرگىلىكتى اتقارۋشى ورگانداردىڭ دەڭگەيىنە بەرۋ ۇسىنىلادى. بەسىنشىدەن، شاعىن كاسىپكەرلىك سۋبەكتىلەرى ەڭبەكشى كوشىپ كەلۋشىلەردى ءتيىستى رۇقسات الماي زاڭسىز قىزمەتكە تارتۋ فاكتىلەرىنىڭ كوپ كەزدەسۋىنە بايلانىستى، ايىنا 8 ا ە ك سالىق الىمدارىن تولەۋ ارقىلى ش ج ك- نى تارتۋدىڭ قولدانىستاعى تەتىگىنە سايكەس، ەڭبەكشى كوشىپ كەلۋشىلەردى «ماۋسىمدىق جۇمىسشىلارعا» تەڭەستىرۋدى ۇسىنامىز. بۇل رەتتە، ماۋسىمدىق جۇمىسشىلارعا جۇمىسقا قابىلدانۋى ءۇشىن كاسىپتەر تىزبەسى انىقتالادى»، - دەدى ا. سارباسوۆ.
