ازاماتتاردىڭ نەسيەسىن وتەپ بەرۋدە بانكتەردىڭ قاتىسۋى قانداي بولادى؟
بۇل تۋرالى ق ر پرەمەر-ءمينيسترىنىڭ ءبىرىنشى ورىنباسارى - قارجى ءمينيسترى ءاليحان سمايىلوۆ ءمالىم ەتتى، دەپ حابارلايدى قازاقپارات ءتىلشىسى.
«نەگىزگى بورىشتى وتەۋ مەملەكەت تاراپىنان بولادى. جاڭا ايتىلعانداي، رەسپۋبليكالىق بيۋدجەتتەن 88 ميلليارد تەڭگە كوزدەلەدى. ونىڭ ىشىندە، تاعى 17 ميلليارد تەڭگەنى مەملەكەت تاراپىنان وبليگاتسيا شىعارىپ تارتامىز. سونىمەن، 105 ميلليارد تەڭگە مەملەكەت تاراپىنان كەلەدى. ال ايىپپۇلدار مەن وسىمدەر بويىنشا 75 پايىزى راسىندا دا، قارجى ۇيىمدارى تاراپىنان وتەلەدى. بۇل جۇمىستى ۇلتتىق بانك بانكتەرمەن جانە شاعىن قارجىلىق ۇيىمدارمەن بىرگە كەلىسىم بويىنشا جاسايدى. ايىپپۇل - ول پروتسەنت. بانكتەردىڭ وزدەرى قويعان پروتسەنتتەرى. بۇل بانكتەرگە ەشقانداي سالماق تۇسىرمەيدى»، - دەدى ءاليحان سمايىلوۆ بۇگىن ۇكىمەتتىڭ باسپا ءسوز ورتالىعىندا.
ونىڭ ايتۋىنا قاراعاندا، ەكىنشى دەڭگەيلى بانكتەر مەن قارجىلىق ۇيىمداردا قارىز نەسيەسى وتەلەتىن ازاماتتاردىڭ ءتىزىمى بار. «ءيا، ءار بانكتە، شاعىن قارجى ۇيىمدارىندا جوعارىدا اتالعان الەۋمەتتىك توپقا كىرەتىن ادامداردىڭ ناقتى تىزىمدەرى بار. سوندىقتان، ولار وسى تىزىمدەر بويىنشا جۇمىس جۇرگىزەتىن بولادى»، - دەدى ول.
سونداي-اق شارا بارىسىندا ۇكىمەت باسشىسىنىڭ ورىنباسارى گۇلشارا ءابدىقالىقوۆا ناقتى قانداي ساناتتاعى ازاماتتاردىڭ قارىزى وتەلەتىنىن تاعى ەسكە سالدى.
«بۇل جاعدايدا ءبىز ناقتى جارلىققا بايلانىستى جۇمىس جۇرگىزۋىمىز كەرەك. ساناتتاردى ايتار بولساق، ەڭ بىرىنشىدەن، كوپبالالى وتباسىلار. ولار - ءتورت نەمەسە ودان دا كوپ بالالارى بار وتباسىلار. وسىنداي وتباسىلاردىڭ نەسيەسى بار ما - بازا بويىنشا قارالادى. ەكىنشىدەن، اسىراۋشىسىنان ايىرىلعان جاعدايعا بايلانىستى تولەم الاتىن وتباسىلار. ياعني، قازىر ءبىزدىڭ مەملەكەتتە 600 مىڭعا جۋىق اسىراۋشىسىنان ايىرىلعان وتباسى بار. بازا بويىنشا ولاردىڭ قانشا نەسيەسى بارى قارالادى. كەلەسى، مۇگەدەك بالالارى بار وتباسىلار، 18 دەن اسقان، ءبىراق بالا كەزىنەن مۇگەدەك بالالارى بار وتباسىلار جانە ەڭ از قامتاماسىز ەتىلگەن وتباسىلار، ياعني اتاۋلى الەۋمەتتىك كومەك الاتىندار. وسىنداي وتباسىلاردىڭ دا نەسيەسى بازا بويىنشا قارالادى»، - دەدى ول.
ايتا كەتسەك، ەلىمىزدەگى الەۋمەتتىك تۇرمىسى تومەن توپتاعى ازاماتتار - كوپبالالى وتباسىلار، مۇگەدەك بالالارى بار وتباسىلار، جالعىز اسىراۋشىسىنان ايرىلعان وتباسىلار، اتاۋلى الەۋمەتتىك كومەك الاتىندار جانە جەتىم بالالار ءتۇرلى سەبەپتەرمەن قيىن جاعدايعا تاپ بولىپ، ءوز اتتارىنا العان نەسيەلىك مىندەتتەمەلەرىن ورىنداي الماي وتىر. تىكەلەي جانە اتاۋلى قارجىلاي كومەك رەتىندە جوعارىدا اتالعان ساناتتاعى ازاماتتار ءۇشىن مەملەكەت ەكىنشى دەڭگەيلى بانكتەر مەن شاعىن قارجى ۇيىمدارىنان الىنعان جالپى مولشەرى 300 مىڭ تەڭگەگە دەيىن نەگىزگى نەسيەنى جانە وعان ەسەپتەلگەن سىياقىنى وتەيدى.
