اسقار مامين تاشكەنتتە وزبەكستان پرەزيدەنتى شاۆكات ميرزيەيەۆپەن كەزدەستى
كەزدەسۋ اياسىندا قازاقستاننىڭ ۇكىمەت باسشىسى ەكىجاقتى ىنتىماقتاستىق بويىنشا بىرلەسكەن ۇكىمەتارالىق كوميسسيا وتىرىسىنا قاتىستى، دەپ حابارلايدى primeminister.kz.
قازاقستان پرەمەر-ءمينيسترى اسقار مامين تاشكەنت قالاسىندا وزبەكستان پرەزيدەنتى شاۆكات ميرزيەيەۆپەن كەزدەسۋ وتكىزدى. كەزدەسۋ بارىسىندا قازاقستان مەن وزبەكستان اراسىنداعى ءوزارا ءىس-قيمىلدىڭ بارلىق سپەكترلەرى بويىنشا ەكىجاقتى ىنتىماقتاستىقتى ودان ءارى دامىتۋ ماسەلەلەرى تالقىلاندى.
«قازاقستان وزبەكستانمەن جان-جاقتى ءوزارا ءتيىمدى بايلانىستاردى كەڭەيتۋدى كوزدەيدى»، - دەپ ا. مامين، بۇعان قازاقستاننىڭ تۇڭعىش پرەزيدەنتى - ەلباسى ن. نازاربايەۆ پەن وزبەكستان پرەزيدەنتى ش. ميرزيەيەۆ بەرىك نەگىزىن قالاعان، ەكى ەل اراسىنداعى سوڭعى جىلدارى قالىپتاسقان شىنايى ستراتەگيالىق سەرىكتەستىك ىقپال ەتەتىنىن اتاپ ءوتتى.
ق ر پرەزيدەنتى ق. توقايەۆتىڭ 2019-جىلعى ساۋىردە وزبەكستانعا جاساعان مەملەكەتتىك ساپارى بارىسىندا قازاقستان - وزبەكستان ىنتىماقتاستىعىنا ەلەۋلى قارقىن بەرگەن ماڭىزدى ۋاعدالاستىقتارعا قول جەتكىزىلدى.
«ءبىزدى ىنتىماقتاستىقتىڭ بارلىق باعىتتارى، ونىڭ ىشىندە ساۋدا-ەكونوميكالىق سالاداعى باعىتتار بويىنشا وڭ ديناميكا قۋانتادى. ءبىز ستراتەگيالىق سەرىكتەستىكتى ودان ءارى نىعايتۋعا مۇددەلىمىز»، - دەدى ءو ر پرەزيدەنتى ش. ميرزيەيەۆ.
ق ر پرەمەر-ءمينيسترى كولىك جانە ترانزيت، ينۆەستيتسيالىق ىنتىماقتاستىق، اۋىل شارۋاشىلىعى، ەنەرگەتيكا، قورعانىس-ونەركاسىپتىك سالا، سيفرلاندىرۋ، تۋريزم، مادەني-گۋمانيتارلىق بايلانىستار سالاسىنداعى زور پەرسپەكتيۆالاردى اتاپ ءوتتى.
تاشكەنتتە قازاقستان پرەمەر-ءمينيسترى ءوزىنىڭ وزبەك ارىپتەسى ا. اريپوۆپەن ق ر مەن ءو ر اراسىنداعى ەكىجاقتى ىنتىماقتاستىق بويىنشا XVIII بىرلەسكەن ۇكىمەتارالىق كوميسسيا وتىرىسىنا قاتىستى. كوميسسيا وتىرىسى ەكى ەلدىڭ مەملەكەتتىك ورگاندارىنىڭ باسشىلارى مەن بيزنەس قاۋىمداستىقتارى وكىلدەرىنىڭ قاتىسۋىمەن ءوتتى.
«وزبەكستان - قازاقستاننىڭ ءۇشىنشى ساۋدا سەرىكتەسى»، - دەپ ق ر پرەمەر-ءمينيسترى، ەكى ەل اراسىنداعى ساۋدا-ەكونوميكالىق ىنتىماقتاستىقتىڭ قارقىندى دامىپ كەلە جاتقانىن ايتتى.
وزبەكستان ۇكىمەتىنىڭ باسشىسى ا. اريپوۆ ەكى ەلدىڭ بيزنەس قۇرىلىمدارىنىڭ اراسىندا تىكەلەي بايلانىس ورناتۋعا مۇمكىندىك بەرەتىن العاشقى ق ر جانە ءو ر ايماقارالىق فورۋمنىڭ جانە ورتالىق ازيا ەكونوميكالىق فورۋمىنىڭ ماڭىزدىلىعىن اتاپ ءوتتى.
بەلسەندى دامىپ كەلە جاتقان تىعىز بايلانىستاردىڭ كورسەتكىشى - ق ر مەن ءور اراسىنداعى ءوزارا ساۋدانىڭ ءوسۋى: 2018-جىلدىڭ قورىتىندىسى بويىنشا تاۋار اينالىمى $3 ميللياردقا جۋىق مولشەرگە جەتتى. 2019 جىلعى قاڭتار-ءساۋىر ايلارىندا وتكەن جىلدىڭ سايكەس كەزەڭىمەن سالىستىرعاندا %20,8- عا ارتىپ، $1,1 ميللياردتى قۇرادى. تاراپتار ۇكىمەتارالىق كوميسسيا قابىلداعان شەشىمدەر ەكىجاقتى قارىم-قاتىناستاردى نىعايتۋعا سالماقتى ۇلەس قوسىپ، ەكى ەل ەكونوميكاسىن دامىتۋ ءۇشىن جاڭا مۇمكىندىكتەر اشاتىنىنا سەنىم ءبىلدىردى.
وتىرىسقا قاتىسۋشىلار 2018-جىلى «قازاقستانداعى وزبەكستان جىلىنىڭ» تابىستى وتكەنىن، سونداي-اق 2019 -جىلى «وزبەكستانداعى قازاقستان جىلىن» وتكىزۋ بويىنشا ءىس-شارالار جوسپارىن ساپالى ورىنداۋدىڭ ماڭىزدىلىعىن اتاپ ءوتتى.
قازىر وزبەكستاندا قازاقستاندىق كاپيتالدىڭ قاتىسۋىمەن 600 گە جۋىق بىرلەسكەن كاسىپورىن جۇمىس ىستەيدى، قازاقستاندا وزبەك كاپيتالىنىڭ قاتىسۋىمەن 1 مىڭنان استام كاسىپورىن بار، ونىڭ ىشىندە 400 دەن استامى - بىرلەسكەن كاسىپورىندار. ۇكىمەتارالىق كوميسسيا جۇمىسىنىڭ قورىتىندىسى بويىنشا جالپى سوماسى $1,5 ميللياردتان اساتىن 27 قۇجاتقا قول قويىلدى.
كەلىسىمدەر ساۋدا-ەكونوميكالىق، ينۆەستيتسيالىق، ترانزيتتىك-كولىك، اۋىل شارۋاشىلىعى سالالارىندا، جەڭىل ونەركاسىپتە، فارماتسيەۆتيكادا ىنتىماقتاستىقتى دامىتۋعا باعىتتالعان.
وتىرىس قورىتىندىسى بويىنشا بىرلەسكەن ۇكىمەتارالىق كوميسسيانىڭ تەڭ ءتوراعالارى قازاقستان پرەمەر-ءمينيسترى ا. مامين مەن وزبەكستان پرەمەر-ءمينيسترى ا. اريپوۆ ءتيىستى حاتتاماعا قول قويدى.
