ارمەنيا مەن رەسەيدەن ەلگە اكەلىنگەن كولىكتەر جاپپاي تىركەلەدى
«ارمەنيا مەن رەسەيدەن كەلەتىن كولىكتەر بويىنشا ماسەلە - شىنىندا دا، وتە ماڭىزدى سۇراق. ءبىزدىڭ اقپاراتتىق جۇيەلەردە ول كولىكتەر تىركەلمەگەن. ءبىز ولاردى اكىمشىلىك جاۋاپكەرشىلىككە تارتا المايمىز. ءبىراق، بۇل باعىتتاعى جۇمىس جۇرگىزىلىپ جاتىر. كامەرالار بويىنشا الداعى ۋاقىتتا بارلىق كولىكتەر تىركەلەتىن بولادى. سودان كەيىن ءبىز ولاردى اكىمشىلىك جاۋاپكەرشىلىككە تارتامىز» ، - دەدى ەرلان تۇرعىمبايەۆ حالىققا ەسەپ بەرۋ جيىنىنان كەيىن تىلشىلەردىڭ سۇراعىنا بەرگەن جاۋابىندا.
ەسكە سالا كەتسەك، وسى جىلدىڭ باسىندا پارلامەنت سەناتىنىڭ جالپى وتىرىسىندا ءبىر توپ دەپۋتات سوڭعى كەزدە ەلىمىز اۋماعىنا رەسەي، ارمەنيا، قىرعىزستان ەلدەرىنەن كوپتەپ جەتكىزىلىپ جاتقان ەسكى كولىكتەرگە قاتىستى ماسەلەنى كوتەرگەن بولاتىن. دەپۋتاتتاردىڭ ايتۋىنشا، اتالمىش ەلدەردەن ساتىپ اكەلىنىپ جاتقان ەسكى كولىكتەر ەش جەردە تىركەلمەي، جول ەرەجەسىن بۇزۋعا ابدەن اۋەستەنىپ كەتكەنى حالىقتى جانە قۇقىق قورعاۋ ورگاندارىن ابىگەرگە سالۋدا.
