ۇلتتىق قاۋىپسىزدىك كوميتەتى قىتايعا زاڭسىز شيكىزات تاسىمالداپ كەلگەن قىلمىستىق توپتى قۇرىقتادى
بۇل تۋرالى ق ر ۇلتتىق قاۋىپسىزدىك كوميتەتىنىڭ باسپا ءسوز قىزمەتى حابارلادى.
باسپا ءسوز مالىمەتتەرىنە قاراعاندا قىلمىستىق توپ قۇرامىنا قازاقستان مەن ق ح ر ازاماتتارى كىرگەن. قۇرامىندا التىنى بار كەندى اۋقىمدى تۇردە زاڭسىز ءوندىرۋ جانە ۇرلاۋ اقمولا وبلىسىنىڭ ستەپنوگورسك وڭىرىندە ورنالاسقان كەن ورنىنان جۇزەگە اسىرىلعان.
شيكىزاتتى زەرتتەۋ جانە قايتا وڭدەۋ ءۇشىن ارنالعان جاسىرىن زەرتحانالار جويىلدى. التىن قۇرامى جوعارى (تونناسىنا 1 كەلى دەيىن) قازاقستاندىق كەن ءارتۇرلى مينەرالداردىڭ (كۆارتسيت، پيريت جانە باسقالارى) بۇركەمەسىمەن جالعان قۇجاتتار بويىنشا شەتەلگە شىعارىلعان.
قىلمىسكەرلەر قۇرامىندا التىنى بار شيكىزاتتىڭ اي سايىن شامامەن 100 تونناسىن شىعارىپ وتىرعان.
ۇ ق ك جۇرگىزگەن ارنايى وپەراتسيا بارىسىندا قىلمىستىق توپ مۇشەلەرى قۇنى 250 ميلليون تەڭگەدەن استام، سالماعى 106 توننادان ارتىق كونتراباندالىق جۇكتىڭ كەزەكتى پارتياسىن نەمەسە قۇرامىندا التىنى بار ەكى ۆاگون كەندى شىعارۋ كەزىندە، ياعني قىلمىس ۇستىندە ۇستالدى.
2019-جىلعى 20- ماۋسىمدا الماتى قالاسىنىڭ قىلمىستىق ىستەر بويىنشا مامانداندىرىلعان اۋدانارالىق سوتى بارلىق 12-ايىپتالۋشىنى ق ر ق ك 234 (ەكونوميكالىق كونتراباندا) جانە 264 (ترانسۇلتتىق ۇيىمداسقان توپ، ترانسۇلتتىق قىلمىستىق ۇيىم قۇرۋ، ولارعا باسشىلىق ەتۋ، سونداي-اق ولارعا قاتىسۋ) باپتارىمەن كوزدەلگەن قىلمىس جاساعانى ءۇشىن كىنالى دەپ تانىپ، ۇزاق مەرزىمگە باس بوستاندىعىنان ايىرۋعا سوتتادى.
بۇرىن 2019-جىلعى ساۋىردە ۇ ق ك ورگاندارى ترانسۇلتتىق توپ جەتەكشىلەرىنىڭ ءبىرى «ر» دەگەن ق ح ر ازاماتىن قىرعىز رەسپۋبليكاسىنان ەكستراديتسيالاعان بولاتىن، ول سوت ۇكىمىن كۇتۋدە.
