رەسپۋبليكالىق گازەتتىڭ «ءجۇز جىلدىق جىلناما» اتتى كىتابى وقىرمانعا جول تارتتى
بۇگىن نۇر-سۇلتان قالاسىنداعى ۇلتتىق اكادەميالىق كىتاپحانادا جيناقتىڭ تۇساۋى كەسىلدى، دەپ حابارلايدى قازاقپارات ءتىلشىسى.
جيناقتىڭ تۇساۋى كەسىلمەس بۇرىن باسىلىم تاريحى باياندالاتىن دەرەكتى فيلم ۇسىنىلدى.
«Egemen Qazaqstan» رەسپۋبليكالىق گازەتى» ا ق-نىڭ باسقارما ءتوراعاسى دارحان قىدىرالىنىڭ ايتۋىنشا، 1919-1976 -جىلدار ارالىعىن قامتيتىن 5 تومدىق جيناق ازىرگە 2000 دانامەن تارالىپ وتىر.
«1919 -جىلى «ۇشقىن» دەگەن اتپەن شىعا باستاعان باسىلىم ءار جىلدارى ءتۇرلى اتپەن شىقسا دا، ءتىلدىڭ، ءدىننىڭ، جەردىڭ، ەملەنىڭ ماسەلەسىن، ۇلت مۇددەسىن كوتەردى. سول تۇستاعى زيالىلاردىڭ اراسىنداعى ايتىس- تارتىس، اشارشىلىق، رەپرەسسيا، سوعىس پەن تىڭ يگەرۋ سياقتى تاريحي وقيعالاردىڭ ءبارى وسى جيناقتا قامتىلدى. قازاق تاريحىنىڭ شەجىرەشىسىنە اينالعان گازەتتىڭ بەتىندە سماعۇل ءسادۋاقاسوۆ، جۇسىپبەك ايماۋىتوۆ، مۇحتار اۋەزوۆ، بەيىمبەت مايلين، ساكەن سەيفۋللين، تۇرار رىسقۇلوۆ، وراز جاندوسوۆ، عابباس توعجانوۆ، عابيت مۇسىرەپوۆ سياقتى ارىستاردىڭ ءىزى قالدى. كوپ ادام ول تۇستا گازەتتى ورتالىق كوميتەتتىڭ ورگانى بولعان دەپ ويلايدى. ولاي بولماعانىنا وسى بەس تومدىقتى وقىپ كوز جەتكىزۋگە بولادى. بۇل جيناق گازەت وقىرماندارىنا عانا ەمەس، جۋرناليستيكا تاريحى مەن ادەبيەتتىڭ وتكەنىن زەرتتەپ جۇرگەن عالىمدارعا، كاسىبي تاريحشىلارعا دا تاپتىرماس قۇرال بولادى دەپ ويلايمىن»، - دەيدى دارحان قىدىرالى.
100 جىلدىق مەرەيتوي قارساڭىندا جيناقتالعان تۋىندىنىڭ ەلەكتروندىق نۇسقاسى كەيىن ينتەرنەت قولدانۋشىلارعا دا قولجەتىمدى بولماق. «ءجۇز جىل ىشىندە گازەت بىرنەشە الىپبيمەن شىقتى. سونىڭ ءبارىن بىرىزدەندىرىپ، جالپى حالىققا تۇسىنىكتى قارىپپەن قايتا باستىق. گازەتتىڭ ءار جىلداردا ءار اتپەن شىققان تىگىندىلەرىن ىزدەۋگە عالىمداردى دا جۇمىلدىردىق. «ۇشقىندى» ءبىر جەردەن تاپساق، «ەڭبەك تۋىن» تاعى ءبىر جەردەن تاپتىق. ەندىگى مىندەت - شەرحان مۇرتازا، ءابىش كەكىلبايەۆ سياقتى تۇلعالار باسقارعان كەزەڭدەردەگى سۇبەلى سانداردى كىتاپقا باسۋ»، - دەيدى گازەت باسشىسى.
جيناقتى قۇراستىرۋشىلار كىتاپقا رەسمي تاريحتا كەزدەسە بەرمەيتىن قۇندى دەرەكتەر ەنگەنىن ايتادى.
«ساكەن سەيفۋليننىڭ كەزىندەگى مەملەكەتتىك ءتىل ءۇشىن باسپا ءسوز بەتىندە قالاي كۇرەس جۇرگەنىن، 1923 -جىلى ۇلتقا قازاق اتاۋىن قايتارۋ ءۇشىن كىمدەردىڭ باسىن بايگەگە تىككەنىن كورۋگە بولادى»، - دەدى نامازالى وماش.
بۇگىنگى شاراعا شاقىرىلعان وزگە دە مارتەبەلى مەيماندار باسىلىم ۇجىمىنا اقجارما تىلەكتەرىن ارنادى.
