سايلاۋ جوعارى ۇيىمداستىرۋشىلىق دەڭگەيدە ءوتتى - ت م د اتقارۋشى كوميتەتىنىڭ ءتوراعاسى
مۇنداي پىكىردى ت م د اتقارۋشى كوميتەتىنىڭ ءتوراعاسى - اتقارۋشى حاتشى سەرگەي لەبەديەۆ ايتتى، دەپ حابارلايدى قازاقپارات ءتىلشىسى.
«ءبىز قازاقستانداعى سايلاۋ جوعارى ۇيىمداستىرۋشىلىق دەڭگەيدە جانە ەركىن احۋالدا ءوتتى دەگەن قورىتىندىعا كەلدىك. سايلاۋ كونستيتۋتسياعا جانە كونستيتۋتسيالىق زاڭعا ساي ءوتتى. ول اشىق، دەموكراتياعا ساي جانە باسەلەكەستىك جاعدايدا بولدى. جالپى، ءبىز قازاقستانداعى سايلاۋدى بايقاۋ ءۇشىن ت م د-نىڭ 8 ەلىنەن 432 ادام كەلدىك. رەسپۋبليكانىڭ بارلىق وبلىستارىندا، 3812 سايلاۋ ۋچاسكەسىندە بولدىق»، - دەدى ول ورتالىق سايلاۋ كوميسسياسىندا وتكەن بريفينگتە.
ونىڭ ايتۋىنشا، ت م د بايقاۋشىلارى ميسسياسىنىڭ قۇرامىنا ت م د ەلدەرىنىڭ پارلامەنتاريلەرى، ورتالىق سايلاۋ كوميسسيالارىنىڭ ءتوراعالارى جانە ديپلوماتتار كىرگەن.
سونىمەن قاتار ول سايلاۋ بارىسىندا ورىن العان كەيبىر بۇزۋشىلىقتارعا توقتالىپ، وعان قاتىستى پىكىرىن ءبىلدىردى.
«جەكەلەگەن كەمشىلىكتەر ونداعان عانا، ال داۋىس بەرگەن ادامداردىڭ سانى 9 ميلليوننان اسىپ جىعىلادى. سوندىقتان ونىڭ اياسىندا بۇل سان تۇككە تۇرمايدى. بەرىلگەن داۋىس سانى قازاقستان حالقىنىڭ پىكىرىن بىلدىرەدى. ءبىز بۇل سايلاۋدى مويىندايمىز»، - دەدى سەرگەي لەبەديەۆ.
