الماتى پوليتسياسى جولدا قالعان فرانسۋز وتباسىنا كومەكتەستى
ەرلى-زايىپتىلار 4 بالاسىمەن بىرگە قازاقستانعا ساياحاتقا شىققان. ءبىراق ولاردىڭ كولىگى بۇزىلىپ، تۇراتىن جەر تاپپاي تۇرعان كەزدە پوليتسەيلەر كومەكتەسكەن.
ءتارتىپ ساقشىلارى شەتەلدىك تۋريستەرگە ۋاقىتشا تۇرعىن جاي تاۋىپ بەرىپ، كولىكتەرىن جوندەۋگە كومەكتەستى.
بۇل وتباسىنى قازاقستاندىقتار جاقسى بىلەدى. ەكى اي بۇرىن برياندار شىمكەنتتە بولىپ قايتقان.
«سيلۆا مەن ۆيۆيان بريان بۇل جولى ورتالىق ازيا ەلدەرىن ارالاۋعا شىققان. شىمكەنتتەن الماتىعا كەلگەندە ولاردىڭ كولىگىنىڭ موتورى بۇزىلىپ قالعان. بۇل دوڭگەلەگى بار ۇلكەن ءۇي بولعاندىقتان، كولىكتى جوندەۋ كوپ اقشانى تالاپ ەتەدى. بۇل پروبلەمانى ەستىگەن دەپارتامەنت باسشىلىعى برياندار وتباسىنا بارىنشا كومەك بەرۋگە تاپسىرما بەردى. اۆتوورتالىق وتباسىنىڭ كولىگىن جوندەۋگە جەڭىلدىكپەن قىزمەت كورسەتتى. جوندەۋ جۇمىستارى ۇزاققا سوزىلعاندىقتان، پوليتسيا دەپارتامەنتى وتباسىعا ۋاقىتشا ءۇي جالداۋعا كومەكتەستى»، - دەدى قالالىق پ د تۋريستىك پوليتسيا ءبولىمىنىڭ اعا ينسپەكتورى جەڭىسبەك شالبايەۆ.
وتباسى پوليتسيا قىزمەتكەرلەرىنە العىس ءبىلدىردى.
«ءبىزدىڭ مادەنيەتىمىز ءارتۇرلى. قازاقستانداعى قوناقجايلىلىققا ءتانتىمىن. قيىن جاعدايعا ۇشىراعاندا الماتى پوليتسياسى كومەكتەستى. كوپ راحمەت»، - دەدى سيلۆا بريان.
