لوندوندا سايلاۋ قالاي ءوتتى
ەلشىلىك جانىنداعى № 244 -سايلاۋ ۋچاسكەسىندە قازاقستان رەسپۋبليكاسى پرەزيدەنتىنىڭ سايلاۋىنا داۋىس بەرۋ لوندون ۋاقىتىمەن (نۇر-سۇلتان ۋاقىتىنان 5 ساعات ارتتا) 07:00 دەن 20:00 گە دەيىن وتكىزىلدى.
ءوز ەلىنىڭ بولاشاعىن ايقىنداۋعا ۇمتىلا وتىرىپ، ق ر ازاماتتارى لوندونعا بىرىككەن كورولدىكتىڭ تۇكپىر-تۇكپىرىنەن، ياعني ەدينبۋرگ، مانچەستەر، ابەردين، گلازگو جانە باسقا قالالاردان جول ءجۇرىپ كەلدى.
لوندوندا داۋىس بەرگەن العاشقى سايلاۋشى بورنمۋت ۋنيۆەرسيتەتىنىڭ ستۋدەنتى بەكزات ىرزا بولدى. وعان تۋعان ەلىنەن اكەلىنگەن ەستەلىك كادەسىيلار تابىس ەتىلدى.
«بۇگىنگى سايلاۋ ەلىمىزدىڭ بەدەلىن، بەرەكەسىن ارتتىرادى دەپ ويلايمىن. جانە وسىنداي اسا ماڭىزدى شارادان جاستار تىس قالماۋى كەرەك دەپ، لوندونعا ارنايىلاپ كەلدىم»، - دەدى ب. ىرزا.
لوندونداعى سايلاۋ ۋچاسكەسىندە تانىمال اۋىر اتلەت يليا يلين دە داۋىس بەردى. جاقىندا ول كوۆەنتري قالاسىندا وتكەن اۋىر اتلەتيكادان «British International Open 2019» حالىقارالىق تۋرنيرىنە قاتىسىپ، كۇمىس جۇلدەگە يە بولدى.
سايلاۋ ۋچاسكەسىنىڭ جۇمىسىنا «ەركىندىك قاناتى» قوعامدىق قورىنىڭ بايقاۋشىسى دا قاتىستى. بايقاۋشىعا سايلاۋ ۋچاسكەسىندە بولىپ، سايلاۋ وتكىزۋ بارىسىن كەدەرگىسىز باقىلاۋ مۇمكىندىگى قامتاماسىز ەتىلدى. قوعامدىق ۇيىمنىڭ وكىلى جاشىكتەردىڭ بۇتىندىگىن تەكسەرىپ، بيۋللەتەندەردى ساناۋدان باستاپ، سايلاۋ كوميسسياسىنىڭ حاتتاماسىن جاساپ، قول قويعانعا دەيىنگى بۇكىل سايلاۋ پروتسەسىن بايقاپ وتىردى.
«ەلشىلىك قىزمەتكەرلەرى اشىق جانە ءادىل سايلاۋ وتكىزۋدى، سايلاۋ ۋچاسكەسىنىڭ ۇزدىكسىز جۇمىس ىستەۋىن، سونداي-اق ق ر ازاماتتارىنىڭ قاۋىپسىزدىگىن قامتاماسىز ەتۋ ءۇشىن بارلىق كۇش-جىگەرىن جۇمسادى. ەلشىلىك قوناقتاردى جىلى قارسى الىپ، ولارعا باۋىرساق، جەنت، ىرىمشىك جانە قۇرت سەكىلدى ۇلتتىق تاعامدار مەن وتاندىق كونديتەرلەردىڭ ونىمدەرىن ۇسىندى»، دەلىنگەن حابارلامادا.
