قازاق كۇرەسىنىڭ چەمپيونى ايبەك نۇعىماروۆ ەڭ باستى ارمانىن ايتتى
«قازاقستان بارىسى» سايلاۋدان ءبىر كۇن بۇرىن وتەتىندىگى حابارلانعان بولاتىن. سوندىقتان ەلورداداعى وقۋشىلار سارايىندا داۋىس بەرۋگە تىركەلدىك. بۇگىنگى كۇن ماڭىزدى ەكەنىن ايتپاسا دا تۇسىنىكتى. بۇل كۇنى قازاقتىڭ تاعدىرى شەشىلەتىن، بولاشاعىمىز ايقىندالاتىن كەزەڭ. بۇگىن سايلانعان پرەزيدەنت ەلىمىزدىڭ مۇددەسىن الەمدە قورعاي الاتىنىنا، ناعىز لايىقتى ساياساتكەرگە بولاتىنىنا سەنىمدىمىن»، - دەدى سپورتشى.
بۇدان بولەك ول كەشە وتكەن تۋرنيردەن كەيىنگى پىكىرىمەن ءبولىستى.
«كەشەگى كۇنى بۇيىرتىپ، «قازاقستان بارىسى» اتاندىم. ول جەردە جەرەبە بويىنشا ەڭ اۋىر قارسىلاستار، ياعني جەڭىسكە مۇمكىندىگى جوعارى بالۋاندار ءبىر جاققا ءتۇستى. فينالدا شىعىس قازاقستاندىق ەراسىل قاجىبايەۆپەن شىقتىم. وتە ۇلكەن ءارى تارتىستى جارىس بولدى دەپ ويلايمىن»، - دەدى ا. نۇعىماروۆ.
وسى ورايدا ول ءوزىنىڭ نەگىزگى مىندەتتەرىنىڭ ءبىرى ۇلتتىق كۇرەستى كەيىنگى ۇرپاققا ناسيحاتتاۋ ەكەنىن اتاپ ءوتتى.
«قازىرگى كەزدە قازاق كۇرەسىن جاپونداردىڭ دزيۋدو كۇرەسى سياقتى كەڭىنەن تاراتۋعا ۇلەس قوسقىمىز كەلەدى. جالپى، قازاق كۇرەسىن دامىتۋعا مەملەكەت تاراپىنان قاجەتتى قولداۋ جاسالىپ جاتقانىن سەزىنىپ وتىرمىز. بۇل باعىتتاعى قادامداردى ەسكەرە وتىرىپ، قازاق كۇرەسى بولاشاقتا وليمپيادا ويىندارىنا ەنۋىن ارماندايمىن»، - دەدى ايبەك نۇعىماروۆ.
بۇدان بۇرىن حابارلانعانداي، جاقىندا ق ر قازاق كۇرەسى فەدەراتسياسىنىڭ پرەزيدەنتى ارمان شورايەۆ الەمنىڭ 29 ەلىندە قازاق كۇرەسى فەدەراتسياسى اشىلعانىن ءمالىم ەتتى.
ەسكە سالا كەتسەك، ەلوردادا وتكەن «قازاقستان بارىسى-2019» تۋرنيرىندە ايبەك نۇعىماروۆ جەڭىمپاز اتاندى. فينالدا ول شىعىس قازاقستاندىق تاعى ءبىر بالۋان ەراسىل قاجىبايەۆتان ايلاسىن اسىردى.
تۋرنيردە ەكىنشى جانە ءۇشىنشى ورىندى ەراسىل قاجىبايەۆ پەن رۋسلان ءابدىرازاقوۆ يەلەندى.
قازاقستان بارىسى اتانعان ايبەككە 25 ميلليون تەڭگەدەن بولەك، التىن بەلبەۋ مەن التىننان قۇيىلعان اۋىسپالى «تايتۇياق» تابىس ەتىلدى. Ⅱ جانە Ⅲ ورىنعا يە بولعان ەراسىل قاجىبايەۆ پەن رۋسلان ءابدىرازاقوۆقا 5 ميلليون جانە 1 ميلليون 800 مىڭ تەڭگە بەرىلدى. سونىمەن قاتار پالۋاندارعا ءار جەڭىسى ءۇشىن 100 مىڭ تەڭگە اقشالاي سىيلىق تابىستالدى.
ايتا كەتەرلىگى، ايبەك نۇعىماروۆ 2013 -جىلى دا «قازاقستان بارىسى» اتانعان بولاتىن.
