نۇر-سۇلتاننىڭ كورنەكى ورىندارىنا ۇلىلاردىڭ ونەگەلى سوزدەرى ءىلىنىپ جاتىر
بۇل تۋرالى قالالىق تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى ساكەن ەسىركەپ قازاقپارات تىلشىسىنە بەرگەن سۇحباتىندا ءمالىم ەتتى.
«ەلوردا ءتۇرلى دەڭگەيدەگى بيىك تە كوركەم عيماراتتارىمەن تانىمال. ەندىگى ۋاقىتتا قالانىڭ ۇلتتىق ناقىشتاعى وزىندىك ەرەكشەلىگى بولۋى ءتيىس دەگەن ويمەن ءبىز جاڭا باستاما كوتەردىك. اتاپ ايتقاندا، قالاداعى حالىق ءجيى باراتىن ويىن- ساۋىق ورتالىقتارى مەن ءىرى ساۋدا ورتالىقتارىنا كەلۋشىلەرگە تاربيەلىك- ونەگەلىك باعىتتاعى ۇلاعاتتى سوزدەردىڭ قازاقشا اۋديوجازباسىن تىڭداتۋ. قازىرگى ۋاقىتتا 32 ناقىل ءسوزدىڭ اۋديوسىن ازىرلەپ، قالاداعى 35 ساۋدا ورنىندا كۇنىنە 20 رەتتەن تاراتىپ جاتىرمىز. بۇگىن ستاتيستيكاسىن قاراسام، جيىرما كۇندە قالا تۇرعىندارى مەن قوناقتارى 10500 رەت ناقىل سوزدەردى تىڭداپتى»، - دەدى س. ەسىركەپ.
ونىڭ ايتۋىنشا، اتالعان باستاما قالا اكىمىنىڭ قولداۋىنا يە بولدى. وسى تۇرعىدا ۇلاعاتتى سوزدەر اۋديوجازبادان بولەك، قالا كوشەلەرىندەگى بيلبوردتار مەن پيلوندارعا ىلىنە باستادى.
«قازىر قالانىڭ ەڭ كورىكتى جەرلەرىنىڭ ءبىرى - نۇرجول بۋلۆارىنداعى پيلوندارعا قويىلىپ جاتىر. ودان بولەك، الداعى ۋاقىتتا قوعامدىق كولىك ايالدامالارى مەن اۆتوبۋس ىشىندەگى مونيتورلارعا ارنالعان ءتۇرلى تاقىرىپتاردا 30 سەكۋندتىق الەۋمەتتىك روليكتەر دە دايىندالۋدا. سونداي- اق، قالا بويىنشا ۇيلەردىڭ قابىرعاسىنا تاربيەلىك ءمانى بار سۋرەتتەر سالىپ، ونىڭ جانىنا ماقال- ماتەلدەر جازۋ جوسپارى دا بار»، - دەدى ول.
ءتىل باسقارماسى باسشىسى ورىنباسارىنىڭ مالىمدەۋىنشە، اتالعان جوباعا ا. قۇنانباي ۇلى، ا. بايتۇرسىن ۇلى، ب. مومىش ۇلى جانە تاعى باسقا ۇلت ۇلىلارىنىڭ ناقىل سوزدەرى قولدانىلدى.
