استانا كەشتەرى: «ۋولتون حانىمنىڭ باعى» قازاقستاندا تۇڭعىش رەت قويىلادى

«بۇل فەستيۆالدىڭ ەرەكشەلىگى - ءتۇرلى جانرلاردى بىرىكتىرە الۋىندا. بيىل دا فەستيۆالگە كەلگەن تانىمال جۇلدىزدار الەمدىك پرەمەرالارىمەن قۋانتادى. ماسەلەن، روبەرتو مولينەللي جازعان «ۋولتون حانىمنىڭ باعى» كونتسەرتى قازاقستاندا العاش رەت قويىلادى. لەدي ۋولتون - كومپوزيتور ۋيليام ۋولتوننىڭ ايەلى، ول يتاليانىڭ وڭتۇستىگىندە عاجاپ باق وسىرگەن. بۇل كونسەرتتىڭ ءاربىر ءبولىمى بەلگىلى ءبىر گۇلگە، اعاشقا نەمەسە وسىمدىككە ارنالادى. لەدي ۋولتون ارگەنتينانىڭ تۋماسى بولعاندىقتان، كونتسەرتتىڭ سوڭعى ءبولىمى ارگەنتينادان يتالياعا اكەلىنگەن «پالو بۋراچو» اعاشىنا ارنالادى جانە تانگو ستيلىندە ورىندالادى. تانگونى ورىنداپ تۇرىپ، بيلەمەۋ مۇمكىن ەمەس. سوندىقتان، كونسەرتتى الماتى بالەتىنىڭ ءسوليسى نەلسون پەنيا ەكەۋمىز تانگو بيىمەن اياقتايمىز» ، - دەدى اتاقتى يتاليالىق التيست اننا سەروۆا ق ر مادەنيەت جانە سپورت مينيسترلىگىندە وتكەن باسپا ءسوز ءماسليحاتىندا.

 سونىمەن بىرگە، ۇيىمداستىرۋشىلاردىڭ ايتۋىنشا، ەلىمىزدە تۇڭعىش رەت يتاليالىق كومپوزيتور سالۆاتورە فرەگانىڭ «Magic Horse» وركەسترلىك پەساسى قويىلادى. كومپوزيتور بۇل تۋىندىنى «استانا كەشتەرى» فەستيۆالىنە تارتۋ ەتكەن. تۋىندىنى «سوليستەر اكادەمياسى» مەملەكەتتىك وركەسترى ورىندايدى. بۇل تۋىندى لوس- اندجەلەستەگى Aسademia Music Awards-2019 جۇلدەسىن يەلەنگەن.

ايتا كەتەيىك، 3-7 - ماۋسىم كۇندەرى ەلوردادا ءداستۇرلى استانا كەشتەرى» VIII حالىقارالىق ونەر فەستيۆالى ءوتىپ جاتىر. جىل سايىن فەستيۆالگە كلاسسيكا، حالىق ونەرى، ەسترادا باعىتىنداعى مۋزىكانىڭ ۇزدىك ۇلگىلەرىن ورىندايتىن بەلگىلى ونەر مايتالماندارى قاتىسادى.

 فەستيۆالدىڭ باستى ماقساتى - حالىقتىڭ ءتۇرلى الەۋمەتتىك توپتارىنا الەمدىك ونەردىڭ جاۋھارلارىن تاماشالاۋعا مۇمكىندىك بەرۋ. سوندىقتان ونەردىڭ وزىق ۇلگىلەرىنىڭ بارشا حالىققا قولجەتىمدىلىگىن قامتاماسىز ەتۋ ماقساتىندا بۇل جوبانىڭ كونتسەرتتەرىنە بارلىق بيلەتتەر تەگىن تاراتىلادى.

فەستيۆالدىڭ ەرەكشە قوناقتارى - مۇمكىندىگى شەكتەۋلى جاندار. ۇيىمداستىرۋشىلار ولاردىڭ كونتسەرتكە كەلۋى ءۇشىن ارنايى كولىكپەن قامتاماسىز ەتەدى. ەلوردا تۇرعىندارى مەن قوناقتارى بارلىق كونتسەرتتەرگە بيلەتتەردى «قازاقستان» ورتالىق كونسەرت زالى كاسساسىنان تەگىن الا الادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى