باسقارما ءتوراعاسى بۋرابايدى انتاليامەن سالىستىرماۋعا شاقىردى
بۇل تۋرالى «Kazakh Tourism» ۇلتتىق كومپانياسى» ا ق باسقارما ءتوراعاسى وركەن بيساقايەۆ ايتتى، دەپ حابارلايدى قازاقپارات.
«دەمالىس ورىندارىنىڭ باعاسىنا كەلسەك، دەمالىس قۇنىن ماۋسىمعا، تۋريستىك ۇسىنىس قۇرىلىمىنا، تۋريزم تۇرىنە جانە باسقا دا كوپتەگەن فاكتورلارعا بايلانىستى قاراستىرۋ قاجەت. مىسالى، ۇشاق بيلەتتەرىن الدىن الا ساتىپ الۋ ۇشار الدىندا ساتىپ العان بيلەتتەرگە قاراعاندا ارزانعا تۇسەدى. ال كۋرورتتىق قوناق ءۇي باعاسى ماۋسىمعا جانە تولىعۋىنا وراي قۇبىلادى: ارينە، ناعىز ماۋسىمىندا باسقا ماۋسىمعا قاراعاندا باعا جوعارى بولادى»، - دەدى primeminister.kz سايتىندا سۇحبات بەرگەن ءو. بيساقايەۆ.
وسى ورايدا ول ەل ىشىندە دەمالۋ شەتەلدە دەمالعاننان قىمباتقا تۇسەدى دەگەن پىكىر بار ەكەندىگىن اتاپ وتەدى.
«بۇل رەتتە، كوبىنە تۇركيا مەن بۋرابايدىڭ باعالارىن سالىستىرادى. بۇل ەكى نىسان ينفراقۇرىلىمنىڭ دامۋ دەڭگەيىمەن عانا ەمەس، تۋريستىك ۇسىنىستارمەن، تۋريستىك ماۋسىمنىڭ ۇزاقتىعىمەن جانە باسقا دا جاعدايلارمەن ەرەكشەلەنەدى. بۇل ورايدا بۋرابايدى انتاليامەن سالىستىرۋعا بولمايدى. بۇلاردىڭ ءبىر- بىرىنەن ايىرماشىلىقتارى بار. ءتىپتى باعاسى بىردەي بولعاننىڭ وزىندە ولار ءبىر-ءبىرىنىڭ ورنىن الماستىرا المايدى»، - دەدى باسقارما ءتوراعاسى.
كومپانيا باسشىسىنىڭ اتاپ وتۋىنشە، بۋراباي - بۇل ساناتوريلىك ەمدى ەسەپكە الماعاندا بىركۇندىك تۋرلار، دەمالىس كۇندەرى، قىسقا مەرزىمدى دەمالىس وتكىزىلەتىن جەر.
«ءتىپتى، بۇل جاعدايدا دا كەز كەلگەن قارجىعا دەمالاتىن ورىن: شاتىرلار مەن جەكە ۇيلەردەن باستاپ، بەسجۇلدىزدى قوناقۇيگە دەيىن تابۋعا بولادى. سەرۆيس دەڭگەيىنە بايلانىستى ماسەلەلەر بار. ءبىراق بۇل ۋاقىت پەن باسەكەنىڭ جەتكىلىكتى بولۋىن تالاپ ەتەتىندىكتەن، بىرتىندەپ جونگە كەلەتىن ماسەلە»، - دەدى ءو. بيساقايەۆ.
