ەلباسى پارلامەنت سەناتى جۇمىسىنا باعا بەردى
«وتكەن 30 جىلدىڭ ىشىندە كوپشىلىكتەرىڭىزبەن بىرگە كەلە جاتىرمىز. قۋانىشتى دا، قيىنشىلىقتى دا بىرگە وتكىزىپ، حالىقپەن بىرگە قىزمەت ىستەپ، ەڭبەكتەرىڭىزدى ءسىڭىرىپ كەلەسىزدەر. مەن ارنايى قوس پالاتالى پارلامەنت قۇرىپ، زاڭدى سۇزبەدەن وتكىزىپ، وڭىرلەردىڭ ويىن ەسكەرۋ ءۇشىن جاسادىم. بۇگىنگى ىستەپ وتىرعان شارا اياسىندا ماعان «قۇرمەتتى سەناتور» مارتەبەسىن بەرۋ تۋرالى شەشىم قابىلداعاندارىڭىز ءۇشىن ۇلكەن ريزاشىلىعىمدى بىلدىرەمىن»، - دەدى ەلباسى پارلامەنت سەناتىندا وتكەن سالتاناتتى شارادا.
وسى ورايدا، ن. نازاربايەۆ تاۋەلسىزدىك جىلدارىنداعى قازاقستان پارلامەنتى جۇمىسىنا ءوز باعاسىن بەردى.
«تاۋەلسىزدىك جىلدارى كوپتەگەن وقيعالار بولدى، كوپ جۇمىس ىستەدىك. پارلامەنت كوپتەگەن زاڭداردى قابىلدادى، ولاردىڭ ىشىندە كەلىسپەگەن زاڭداردا دا بولدى. دەگەنمەن دە سەنات ءوز جۇمىستارىنا ۇلكەن جاۋاپكەرشىلىكپەن قاراپ، ونىڭ بارلىعىن ورنىنا كەلتىردى»، - دەدى تۇڭعىش پرەزيدەنت.
بۇدان بۇرىن حابارلانعانداي، بۇگىن ق ر پارلامەنتى سەناتىندا تۇڭعىش پرەزيدەنت-ەلباسى نۇرسۇلتان نازاربايەۆقا «قۇرمەتتى سەناتور» توسبەلگىسى مەن كۋالىگى تابىستالدى.
ق ر تۇڭعىش پرەزيدەنتى - ەلباسىنىڭ دەموكراتيالىق، زايىرلى، قۇقىقتىق جانە الەۋمەتتىك مەملەكەت رەتىندە كونستيتۋتسيالىق- قۇقىقتىق نەگىزدەرىن قالىپتاستىرۋداعى، سونداي-اق وتاندىق پارلامەنتاريزمدى ورنىقتىرۋداعى جانە دامىتۋداعى سىڭىرگەن تاريحي ەڭبەگىن، كونستيتۋتسيانى، ادامنىڭ جانە ازاماتتىڭ قۇقىقتارى مەن بوستاندىقتارىن قورعاۋعا، قوعامنىڭ بىرلىگىن قامتاماسىز ەتۋگە، ەلدىڭ ستراتەگيالىق دامۋ باعدارىن ايقىنداۋعا قوسقان اسا زور ۇلەسىن مويىنداي وتىرىپ، ق ر پارلامەنتى سەناتى ەلباسى نۇرسۇلتان نازاربايەۆقا «قۇرمەتتى سەناتور» مارتەبەسىن بەرۋ تۋرالى شەشىمدى قابىلدادى.
