ماقتاارال تۇرعىنى ەسىرتكى مەن تەرىس ءدىني اعىمدى ناسيحاتتايتىن ادەبيەتتەردى ساقتاعان
ول پوليتسيا دەپارتامەنتى ەكسترەميزمگە قارسى ءىس-قيمىل باسقارماسى جانە ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرىمەن بىرلەسكەن ءىس-شارا اياسىندا ۇستالدى، دەپ حابارلايدى قازاقپارات ءتىلشىسى.
وبلىستىق پ د باسپا ءسوز قىزمەتىنىڭ مالىمەتىنشە، 50 جاستاعى ازاماتتىڭ ءۇيىن تەكسەرۋ بارىسىندا تەرىس ءدىني اعىمدى ناسيحاتتايتىن ادەبيەتتەر مەن ماريحۋاناعا ۇقساس ەسىرتكى زاتتارى تاركىلەنگەن. كەيىننەن بۇل شوپتەردىڭ ەسىرتكى ەكەنى دالەلدەنگەن. وسىدان كەيىن جيناقتالعان بارلىق ايعاق زاتتار مەن ماتەريالدار، سوتقا جولدانعان.
«تۇركىستان وبلىسى ماقتاارال اۋداندىق سوتىنىڭ ۇكىمىنە سايكەس، «ءسالافي» باعىتى بويىنشا دەسترۋكتيۆتىك ءدىني اعىمىنىڭ ۇستانۋشىسى «ماريحۋانا» ەسىرتكى زاتىن زاڭسىز ساتقانى ءۇشىن ق ر قىلمىستىق كودەكسىنىڭ 297-بابى «ەسىرتكى، پسيحوتروپتىق زاتتاردى، سول تەكتەستەردى وتكىزۋ ماقساتىندا زاڭسىز دايىنداۋ، قايتا وڭدەۋ، يەمدەنۋ، ساقتاۋ، تاسىمالداۋ، جونەلتۋ نە وتكىزۋ» بويىنشا 5 جىلعا باس بوستاندىعىنان ايىرىلدى» دەلىنگەن حابارلامادا.
