ەلوردا حالقى اشارشىلىق قۇرباندارىن ەسكە الدى

قازاقتى قىناداي قىرعان زۇلمات قۇرباندارىن استانالىق جۇرت اشارشىلىق قۇرباندارىنىڭ مونۋمەنتى الدىندا ەسكە الدى. ەڭبەكتەگەن سابيدەن ەڭكەيگەن قارتقا دەيىن جينالعان شاراعا، سونداي- اق نۇر- سۇلتان قالاسى اكىمدىگىنىڭ، قازاقستان حالقى اسسامبلەياسى مەن قوعامدىق ۇيىمداردىڭ وكىلدەرى، اقىن- جازۋشىلار قاتىستى.

«بۇگىن ەلىمىز ءۇشىن قارالى كۇن. ⅩⅩ عاسىردا قازاق حالقى قاندى قىرعىنعا ۇشىرادى. 1916 -جىلى پاتشا ۇكىمەتىنىڭ زورلىعىنان قانشاما كوتەرىلىس بولدى. سول شايقاستا قاازاقتىڭ بەتكە ۇستار ازاماتتارى وققا ۇشتى. نارىنقول مەن شىڭعىستاۋ كوتەرىلىستەرى، اداي جانە سوزاق قىرعىنى، 1928 -جىلعى كامپەسكە، 1931-32 - جىلدارى ستاليندىك قانقۇيلىلار قولدان جاساعان اشتىق، 1937 -جىلعى رەپرەسسيا، 1941-45 -جىلعى قان مايدان ەلىمىزدىڭ دەموگرافياسىن ويسىراتىپ- اق كەتتى. جارتى عاسىر بويى قانىمىز بەن كوز جاسىمىز ولشەۋسىز توگىلدى. بۇگىن الجير- ءدىڭ باسىندا بولدىق. ولاردى حالىق جاۋى دەپ ايىپتادى. ال شىندىعىندا ولار حالىقتىڭ ءوزى ەدى، سولاردى قىرعاندار حالىق جاۋى بولاتىن. ەكىنشى دۇنيەجۇزىلىك سوعىستا قىرىلعان بوزداقتارىمىز بەن ەل ىشىندە ساياسي سۇرگىننەن قىرىلعانداردىڭ سانى تەپە- تەڭ. سوندىقتان، بۇگىن ارۋاقتاردى ەسكە الۋعا كەلگەن قاراقۇرىم حالىققا راحمەت. بۇگىنگى كۇن - بىرلىك كۇنى. تاۋەلسىزدىك جولىندا قۇربان بولعان ارۋاقتاردىڭ ۇرپاقتارى ماڭگى جاساي بەرسىن» ، - دەدى اقىن نەسىپبەك ايت ۇلى.

 شارانىڭ رەسمي بولىگى بىتكەن سوڭ شاھار تۇرعىندارى جاپپاي گۇل شوقتارىن قويىپ، ەسكەرتكىش الدىندا تاعزىم ەتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى