قارقارالىدا قۇنانباي مەن ابايعا ەسكەرتكىش ورناتىلدى
سالتاناتتى شاراعا قازاق حالقىنىڭ كەمەڭگەر تۇلعالارىنىڭ ۇرپاقتارى دا كەلدى، دەپ حابارلايدى قازاقپارات ءتىلشىسى.
قارقارالىنىڭ اعا سۇلتانى قۇنانباي قاجى ءوزى مۇرىندىق بولىپ، ءىستىڭ باسى- قاسىندا ءجۇرىپ مەشىت سالدىرعان. حالىق اراسىندا «قۇنانبايدىڭ مەشىتى» - بۇگىنگى كۇنى بۇكىل رەسپۋبليكاعا زور ماقتانىشپەن ايتۋعا دا، كورسەتۋگە دە تۇراتىن مەملەكەت قورعاۋىنداعى تاريح جانە ساۋلەت ەسكەرتكىشى. بۇگىن وسى مەشىتتى سالدىرىپ، يماندىلىقتى ناسيحاتتاپ، مۇرا رەتىندە مەشىت سالىپ كەتكەن قۇنانباي بابامىزعا ۇرپاقتارىنان ءمۇسىن قويىلدى.
قارقارالىدا قۇنانباي وسكەنباي ۇلى مەن بالا ابايعا قويىلعان ءمۇسىن ورناتۋ يدەياسىن اۋدان اكىمى قالەل ماقسۇتوۆ تاستاعان. ال ەسكەرتكىشتى جەرگىلىكتى ءمۇسىنشى ساكەن داۋلەتبايەۆ جاساپ شىققان.
ەسكەرتكىشتىڭ اشىلۋىنا شىعىس قازاقستان وبلىسىنان جانە قاراعاندى وبلىسىنىڭ اباي اۋدانىنان قۇنانباي قاجىنىڭ تۋىستارى مەن الماتى، نۇر-سۇلتان قالالارىنان ارنايى قوناقتار كەلدى.
ءمۇسىندى اشۋ ءراسىمىن قارقارالى اۋدانىنىڭ اكىمى قالەل ماقسۇتوۆ، اباي اۋدانى ءماسليحاتىنىڭ حاتشىسى ەرلان ىلدەبايەۆ ، قوسمان عيمران ۇلى جانە قالا تۇرعىنى ءالياسقار قاپان ۇلى وتكىزدى. اۋداندىق، وبلىستىق اباي وقۋلارىنىڭ جەڭىمپازدارى دۇيسەن ابىلاي مەن ورماش اقەركە اباي ولەڭدەرىن جاتقا وقىدى.
جيىننان كەيىن قوناقتار اباي توقتاعان ءۇيدىڭ الدىندا ورناتىلعان قارقارالىنىڭ تابيعي تاسىنا قاشالىپ سالىنعان ابايدىڭ بەينەسىن بارىپ كوردى. تۋىندىنىڭ اۆتورى، قارقارالى قالاسىنىڭ تاعى ءبىر تالانتتى ۇلى - كارىم ماناربەك.
شارا سوڭى مادەنيەت ۇيىندە قارقارالىنىڭ قۇرمەتتى ازاماتى رىمبالا كەنجەبالا قىزى ارنايى جىبەرگەن «قۇنانباي» فيلمىن تاماشالاۋمەن جالعاستى.
