اقىن اقۇشتاپ باقتىگەرەيەۆا وقىرماندارىمەن جۇزدەستى
اقىننىڭ 75 جاسقا تولۋىنا ورايلاستىرىلعان شىعارماشىلىق كەشتەرى اقجايىق، قازتالوۆ، بوكەي ورداسى، جانىبەك جانە جاڭاقالا اۋداندارىندا ۇيىمداستىرىلدى.
وتكەن جىلدىڭ جەلتوقسانىندا «انا سىرى» كىتابى ءۇشىن ەلباسىنىڭ قولىنان مەملەكەتتىك سىيلىق العان اقىن اۋىل- ايماق تۇرعىندارىمەن ساعىنا كەزدەستى، توگىلە سىر اقتاردى، جاتقا ولەڭدەرىن وقىدى.
«باۋىرمال بولىڭدار، تاتۋ بولىڭدار، اعايىن. قازاق دەگەن ازعانتاي ۇلتتىڭ ءوسىپ- وركەندەۋى ءۇشىن بالانىڭ، اسىرەسە، قىزدىڭ تاربيەسىنە مۇقيات بولىڭدار. ويتكەنى بۇگىنگى قىزدار - ەلدىڭ بولاشاعى ءۇشىن جاۋاپتى ەرتەڭگى انا، اجە ەمەس پە!؟ مەنىڭ باقىتىم - ولەڭدى ءتۇسىنىپ وقيتىن ۇرپاق وسسە ەكەن دەيمىن. سوعان قۋانامىن. ەلگە تىنىشتىق كەرەك. دەموكراتيا دا كەرەك، ءبىراق ول اۋزىنا كەلگەندى ايتىپ، بەتالدى شابا بەرۋ ەمەس. «باسشىعا باعىنباعان ەل بولمايدى، تابىنا بىلمەگەن ەلدىڭ اۋليەسى بولمايدى»، دەيدى. حالقىما ايتارىم، ساۋاتتى بولىڭدار. اربىرەۋىڭ باسقا ۇلتتىڭ اقىلدىسىن توقتاتاتىنداي ءبىلىمدى بولىڭدار دەيمىن. تاۋەلسىزدىك العانىمىزعا وتىز جىل تولا قويعان جوق. بۇل - تاريح ءۇشىن از ۋاقىت. سوندىقتان قازاقتىڭ بولاشاعى الدا. جاستارىمىز قالانى دا، دالانى دا گۇلدەندىرەتىن ۋاقىتقا دا جەتەرمىز. كەي كەزدە سابىرلى دا بولا ءبىلۋ كەرەك. باقىتتى بولىڭدار، امان بولىڭدار»، - دەدى اقىن ءوز سوزىندە.
مەرەيتوي يەسىنە الماتىدان ارنايى كەلگەن اقىن، مەملەكەتتىك سىيلىقتىڭ لاۋرەاتى، جۋىردا تمد ەلدەرى مەملەكەتارالىق گۋمانيتارلىق ىنتىماقتاستىق قورىنىڭ «دوستاستىق جۇلدىزدارى» مەملەكەتارالىق سىيلىعىمەن ماراپاتتالعان ەسەنعالي راۋشانوۆ رياسىز تىلەگىن ارنادى.
«اق جايىق تۋرالى تۋىندىلار بارشىلىق. قازاقتىڭ ۇلكەن جازۋشىسى حامزا ەسەنجانوۆتىڭ كەزىندە «اق جايىق» تريلوگياسى جارىق كورىپ، لايىقتى باعاسىن العانى ءمالىم. سول اق جايىقتى پوەزيا تىلىندە تۇتاس بەت- بەينەسىمەن جىرلاي بىلگەن ءوزىم ۇستاز تۇتاتىن اقۇشتاپ اپامىز دەپ ويلايمىن. ەكىنشىدەن، پايعامبارلاردىڭ اراسىندا بىردە- ءبىر ايەل ادام جوق. ءبىراق سولاردىڭ ءبارى انادان تۋعان. اقۇشتاپ باقتىگەرەيەۆاداي انادان ءتالىم- تاربيە العان دەپ ويلايمىن. اپامىز سول ادال انا بەينەسىن ادەبيەتىمىزدە قالىپتاستىردى. بۇگىندە اقۇشتاپ باقتىگەرەي قىزىنداي ۇلتىمىز ماقتان تۇتاتىن قاداۋ- قاداۋ تۇلعالار وتە سيرەك. جۋىردا اقىننىڭ ولەڭدەرى بۇۇ بەكىتكەن الەمنىڭ التى تىلىنە اۋدارىلىپ، باسىلعالى جاتىر. وعان قوسا جەتىنشى ۇلكەن ءتىل - تۇرىك تىلىندە ىستانبۇل قالاسىندا كىتابى شىقتى دەگەن ءسۇيىنشى حاباردى الىپ وتىرمىز. اقىن باقىتى - ەلمەن تىلدەسۋ، حالىقپەن سىرلاسۋ. اقىنعا ولەڭدەرى جۇرتىنىڭ جۇرەگىندە قالعاننان اسقان باقىت جوق»، دەدى ەسەنعالي راۋشانوۆ.
اقۇشتاپ باقتىگەرەيەۆامەن بىرگە ق ر پرەزيدەنتى اكىمشىلىگىنىڭ قولداۋىمەن قولعا الىنعان قازاقستان جازۋشىلار وداعىنىڭ «ادەبي ولكەتانۋ» جوباسىمەن ەلگە شىققان ورالدىق قالامگەر عايساعالي سەيتاق، الماتىدان كەلگەن جازۋشى قويشىبەك مۇباراك، جاس اقىن اسىلان تىلەگەن ساپارلاس بولدى.
«ءبىز وسى شىعارماشىلىق ساپارىمىزدا اقىنى مەن تاريحىن قۇرمەتتەيتىن ەلدى كوردىك. مۋزەيلەردى ارالاپ، شەجىرەشى قاريالارمەن تىلدەستىك. اڭىز اڭگىمەلەردى، قۇندى دەرەكتەردى جازىپ الدىق. اسىرەسە، بوكەي ورداسى اۋدانىنداعى حان ورداسى مۋزەيى ايرىقشا اسەر قالدىردى. جاڭگىر حانداي تۇلعانى توپىراقتىڭ استىنان ارشىپ الىپ، تاريحي ورىندارىن اسپەتتەپ ۇستاپ وتىرعان ەلدىڭ تىرلىگىنە ريزا بولدىق»، - دەدى قويشىبەك مۇباراك.
وبلىستىق مادەنيەت باسقارماسىنىڭ باسشىسى قادىربولات مۇساعالييەۆتىڭ ايتۋىنشا، اقىن اقۇشتاپ باقتىگەرەيەۆانىڭ رەسپۋبليكالىق دەڭگەيدەگى شىعارماشىلىق كەشى قىركۇيەك ايىندا ورالدا وتەدى. سودان كەيىن تۋعان جەرى - تەرەكتى اۋدانىندا قورىتىندىلانادى.
اۆتور: ەلجان ەرالى
