ەلوردادا بالمۇزداق پەن ءسۇت ونىمدەرى تەگىن ۇلەستىرىلەدى
وبلىستىق اۋىلشارۋاشىلىق باسقارماسىنىڭ باسشىسى نۇربەك بادىراقوۆتىڭ ايتۋىنشا، ازىق- تۇلىكتەر مەن كوكونىستەر ەلوردالىق تۇرعىندار مەن قوناقتارعا بازار نارقىنان 10-15 پايىزعا ارزان ساۋدالاناتىن بولادى.
«نۇر- سۇلتان قالاسىن قاۋىپسىز ازىق- تۇلىكپەن قامتاماسىز ەتۋ جونىندەگى 2018-2020 -جىلدارعا ارنالعان جول كارتاسى اياسىندا تۇركىستان وبلىسى اكىمدىگىنىڭ ۇيىمداستىرۋىمەن ماۋسىم ايىنىڭ 1-2 كۇندەرى اۋىل شارۋاشىلىعى ونىمدەرىنىڭ جارمەڭكەسى وتكىزىلەدى. وڭىرىمىزدە وتكەن جىلدارمەن سالىستىرعاندا كوكتەمگى دالا جۇمىستارى 1 اپتا مەرزىمگە ەرتە باستالدى. ناتيجەسىندە قازىر 250 مىڭ توننا كوكونىس، 22 مىڭ توننا كارتوپ، 1500 تونناعا جۋىق جەمىس- جيدەك ونىمدەرى ءوندىرىلدى» ، - دەدى نۇربەك بادىراقوۆ.
اتالعان شارا اياسىندا سونداي- اق تۇركىستاندىق كاسىپكەرلەر 16 جاسقا دەيىنگى بالالارعا تابيعي تازا بالمۇزداق پەن ءسۇت ونىمدەرىن تەگىن ۇلەستىرەتىن بولادى. يگى ءىس 1 - ماۋسىم «حالىقارالىق بالالاردى قورعاۋ» كۇنىنە وراي ۇيىمداستىرىلادى. ال، جىل سوڭىنا دەيىن تۇركىستان وبلىسىنان ءدال وسىنداي اۋىلشارۋاشىلىق تاۋارلارىنىڭ كەرۋەنى تاعى 4 رەت جولعا شىعادى دەپ جوسپارلانىپ وتىر.
ايتا كەتەيىك، وبلىستا اۋىلشارۋاشىلىق سالاسىنداعى ەڭبەك ونىمدىلىگىن 2,5 ەسەگە ارتتىرۋ ماقساتىندا ينۆەستيتسيالىق جوبالاردى ىسكە اسىرۋعا باسىمدىق بەرىلىپ وتىر. ماسەلەن، بيىلدىڭ وزىندە اتالعان سالادا الدىڭعى قاتارلى تەحنولوگيالاردى قولدانا وتىرىپ جانە حالىقتى جۇمىسپەن قامتۋ باعىتىندا جالپى قۇنى 89 ميلليارد تەڭگە بولاتىن 480 جوبانى جۇزەگە اسىرۋ كوزدەلگەن. جوسپار ورىندالسا، 4620 جاڭا جۇمىس ورىندارى اشىلاتىن بولادى. ءقازىردىڭ وزىندە 130 جوباسى جۇزەگە اسىرىلدى. سونىمەن قاتار، بۇگىندە ەگىس القاپتارىنان جىلىنا 2-3 ءونىم الۋ ماسەلەسى دە نازارعا الىنعان. وسى باعىتتا 69 جوبا قولعا الىنىپ، وڭ ناتيجەگە قول جەتكىزىلگەن.
