مينيستر جۇمىس ورنىندا وقىتۋعا قاتىساتىن كاسىپورىنداردىڭ شىعىندارىن وتەۋدى ۇسىندى
دۋالدى وقىتۋ نەمەسە وقۋشىلىق بۇل - جۇمىس ورنىندا وقىتۋ تۇرلەرىنىڭ ءبىرى.
«جاستارىمىز زامان تالابىنا ساي ءبىلىم الىپ، بىلىكتىلىگىن ارتتىرۋ ءۇشىن ەڭ الدىمەن جۇمىس بەرۋشىلەردى تەحنيكالىق جانە كاسىپتىك ءبىلىم بەرۋ جۇيەسىنە تارتۋ كەرەك. ساپالى مامان دايىنداۋدا دۋالدى وقۋ جۇيەسىنىڭ ءرولى زور ەكەندىگى بەلگىلى. ال بىزدە وسى جۇيە بويىنشا قامتىلعان وقۋشىلاردىڭ ۇلەسى 19,8 پايىزدى عانا قۇرايدى. جۇمىس بەرۋشىلەردىڭ پىكىرىنشە، ونىڭ دامۋىنا پراكتيكانى ۇيىمداستىرۋداعى كاسىپورىن شىعىنىنىڭ وتەلمەۋى، وقۋشىلاردىڭ قاۋىپسىزدىگى ءۇشىن جاۋاپكەرشىلىكتى قامتاماسىز ەتۋ ماسەلەلەرى تەجەپ وتىر. وسى ماسەلەلەردى شەشۋىمىز كەرەك. دۋالدى وقىتۋعا قاتىساتىن كاسىپورىنداردىڭ شىعىندارىن وتەۋدى ۇسىنامىز»، - دەدى مينيستر.
سونىمەن قاتار ول بارلىق ستۋدەنتتەرگە قاۋىپسىزدىك تەحنيكاسى مەن ونەركاسىپتىك قاۋىپسىزدىك كۋرستارىن ۇيىمداستىرۋمەن قاتار ولاردىڭ ءوندىرىس تالابىنا ساي سىناق تاپسىرىپ، كاسىپورىنداردا تاجىريبەدەن وتۋگە رۇقسات الۋىن دا قامتاماسىز ەتۋ كەرەكتىگىنە نازار اۋدارتتى.
«ونەركاسىپتى ىنتالاندىرۋدىڭ باسقا دا جولدارىن قاراستىرۋ ماڭىزدى. وسى ورايدا ءبىز «التىن ساپا» شاراسىندا دۋالدى وقىتۋ جۇيەسىن ەنگىزگەن «ۇزدىك كاسىپورىن»، «ۇزدىك تالىمگەر» جانە «تەحنيكالىق كادرلاردى دايىندايتىن ۇزدىك كوللەدج» اتالىمدارىن قاراستىرۋدى ۇسىنامىز»، - دەدى ك. ءشامشيدينوۆا.
مينيستر دۋالدى وقىتۋ جۇيەسىن كەڭەيتۋمەن قاتار ساتىپ الۋ قۇقىعىنسىز كوللەدجدەردى سەنىمدى باسقارۋعا بەرۋدى دە دامىتقان ءجون ەكەندىگىن ايتتى.
«كوللەدجدەردىڭ ۇيىمداستىرۋ قۇقىقتىق نىسانى، ەسكىرگەن ماتەريالدىق- تەحنيكالىق بازاسى، قولدانىستاعى وقۋ باعدارلامالارى وسى پروتسەستى تەجەۋى مۇمكىن. سوندىقتان ءبىزدىڭ مينيسترلىك ەكونوميكا مەن ەڭبەك نارىعىنا ساي وقۋ مازمۇنىنىڭ تاجىريبەمەن تىعىز بايلانىستىلىعىن، ورتا ءبىلىم جانە ارنايى پاندەرگە سايكەستەندىرۋگە مۇمكىندىك بەرەتىن يكەمدى وقۋ باعدارلامالارىن قاراستىراتىن بولادى»، - دەدى ول.
