جازعى دەمالىس: جانداربەك بەكشين اتا- انالارعا كەڭەس بەردى
وسى رەتتە ق ر دسم قوعامدىق دەنساۋلىق ساقتاۋ كوميتەتىنىڭ ءتوراعاسى - باس مەملەكەتتىك سانيتاريالىق دارىگەر جانداربەك بەكشين بالالارعا قاتىستى بىرنەشە پايدالى كەڭەس ايتتى، دەپ حابارلايدى قازاقپارات ءتىلشىسى.
«ۆاكسيناتسيانى وتكىزۋ ءۇشىن نەگىزىنەن جىل سايىن ەلىمىزدە قىزىلشاعا شالدىعۋدىڭ 1800 جاعدايى تىركەلۋ كەرەك (دۇنيەجۇزىلىك دەنساۋلىق ساقتاۋ ۇيىمىنىڭ كەڭەسى بويىنشا - اۆت. ) . سوندىقتان، ەكپە جۇمىستارىن جۇرگىزبەيمىز. ءبىراق، د د س ۇ نۇسقاۋى بويىنشا ءبىز ۆاكسيناتسيانى ەڭ قاۋىپتى توپتار بويىنشا جۇرگىزەمىز. ۆاكسيناتسيامەن ءۇش توپ قامتىلادى. ونىڭ ءبىرى - 1 جاسقا تولماعان بالالار. قازىرگى ۋاقىتتا 9 ايلىق بالالارعا ەكپە جۇرگىزۋدەمىز. سول سەكىلدى مەديتسينا قىزمەتكەرلەرىنە دە ەكپە جاسالادى. ولار ەرتەڭ اۋىرسا، اۋرۋحانالاردا بۇل اۋرۋ ءورشۋى مۇمكىن. سوندىقتان، مەديتسينا قىزمەتكەرلەرىنىڭ 97 پايىزىن ۆاكسيناتسيادان وتكىزدىك. ءۇشىنشى توپ - وسى اۋرۋعا شالدىققان ادامدارمەن بايلانىستا بولعان ادامدار. قازىرگە دەيىن قىزىلشاعا شالدىققان ادامدارمەن بايلانىستى بولعان 15 مىڭ ادامعا ەكپە جاسادىق» ، - دەدى جانداربەك بەكشين و ك ق- دا وتكەن باسپا ءسوز ءماسليحاتىندا.
باس سانيتاردىڭ ايتۋىنشا، وسى جۇمىستاردىڭ ارقاسىندا قىزىلشا اۋرۋى ساۋىردەن بەرى مامىر ايىندا 18 پايىزعا ازايعان.
«بالالار كانيكۋلعا شىعادى. قايتىپ كەلگەننەن كەيىن 2 ميلليوننان استام ۆانسيناتسيا جۇرگىزەمىز. ول قىزىلشا مەن جەلشەشەك اۋرۋىنىڭ الدىن الۋ ءۇشىن جۇرگىزىلەدى» ، - دەيدى ول.
جانداربەك بەكشين سونداي- اق، بالالار دەمالىسقا شىعىپ جاتقان ۋاقىتتا جۇقپالى اۋرۋلاردان ساقتانۋ كەرەكتىگىن اتاپ ءوتتى.
«قازىر بالالار دەمالىسقا شىعىپ بارادى. ولاردىڭ ءوز- وزىمەن جۇرمەگەنى ابزال. كوزدەن تاسا بولماي، كەز كەلگەن جەردەن سۋ ىشە بەرمەۋى ءتيىس. كوكونىس، جەمىس- جيدەكتى جۋىلعاننان كەيىن جەۋى كەرەك. قولدى ءجيى جۋعان ابزال. اتا- انالار بۇل ماسەلەلەردى ناقتى باقىلاۋعا الۋى ءتيىس. بالالارىمىز سىرتتاعى ساۋىقتىرۋ ۇيىمدارىنا كەتەدى. بىلتىر ونداي ساۋىقتىرۋ ورتالىقتارىنىڭ 219 ى بالالاردى قابىلداعان بولاتىن. قازىرگى تاڭدا ساۋىقتىرۋ ورتالىقتارىنىڭ 48 نە سانيتاريالىق- ەپيدەميولوگيالىق قورىتىندى بەردىك. اكىمدەرمەن بىرلەسىپ، بۇل جۇمىس اتقارىلۋدا. اتا- انالار جاڭادان قۇرىلعان ءبىزدىڭ كوميتەتتىڭ (تاۋارلار مەن قىزمەتتەردىڭ ساپاسى مەن قاۋىپسىزدىگىن قاداعالاۋ كوميتەتى) سايتىنا كىرىپ، سانيتاريالىق ەرەجەلەرگە ساي كەلەتىن ساۋىقتىرۋ ورتالىقتارىن كورە الادى. ول جەردە كۇندەلىكتى جاريالاپ تۇرامىز. ساۋىقتىرۋ ۇيىمى سول تىزىمدە بولسا، بالالاردى سول ۇيىمعا قورىقپاي اپارا بەرۋگە بولادى» ، - دەيدى جانداربەك بەكشين.
