قازاقشا ماتىندەگى قاتەنى تۇزەيتىن پروگرامما جاسالدى

پروگرامماشى ەرلان وسپان قازاق ءتىلىنىڭ ەملەسىن تەكسەرەتىن پروگرامما شىعاردى.

Sawat دەگەن پروگراممانىڭ العاشقى نۇسقاسى (1.0 شىعارىلىم) كوبىنە ءسوزدىڭ ءتۇبىرىنىڭ قاتەسىن كورسەتۋگە باعىشتالعان.

Sawat -  قازىر تەك Windows وپەراتسيالىق جۇيەسىنە يكەمدەلگەن پروگرامما. الداعى نۇسقالاردا سوزدىك قور تولىقتىرىلا تۇسەدى. ازىرشە سوزدىك قوردا 48 مىڭ ءسوز بار.

پروگراممانىڭ جۇمىسى قولدانۋشىلارعا تىكەلەي بايلانىستى. سوزدىك قور مەن ولاردىڭ ساۋاتتى بولۋى قولدانۋشىلار جازعان سوزدەرگە ساي تولىعىپ جانە جاڭارىپ وتىرادى. قازىر سوزدىك قوردى كىتاپتارمەن، گازەتتەردەگى ماقالالارمەن «وقىتۋ» ءجۇرىپ جاتىر. كەلەسى نۇسقالاردا ورفوگرافيالىق قانا ەمەس، گرامماتيكالىق قاتەلەرمەن جۇمىس جۇرگىزۋگە كوڭىل بولىنەتىن بولادى.

العاشقى شىعارىلىمدى - قولدانۋشىلاردى بولاشاق پروگراممانىڭ كونسەپسياسىمەن تانىستىرۋعا ارنالعان دەۋگە دە بولادى. الداعى شىعارىلىمداردا قولدانۋشىلاردىڭ ەسكەرتپەلەرىن جيناۋ جانە وڭدەۋ مەحانيزمدەرى قاراستىرىلادى.

ەرلان وسپان بۇل جوبانىڭ العىشارتتارى 2000 -جىلداردىڭ باسىندا قالىپتاسا باستاعانىن ايتادى. ونىڭ ديپلومدىق جۇمىسى دا ماتىنگە ارنالعان جۇيەلەرگە ارنالعان ەكەن. اۆتور سول كەزدەن بەرى وسى تاقىرىپتى زەرتتەۋىن توقتاتپاعان. كوپ جىلدىق جۇمىستىڭ ناتيجەسىندە وسىنداي پروگرامما ىسكە اسىپ وتىر.

اۆتوردى ينتەرنەتتە، جالپى زاماناۋي قۇرىلعىلارعا ارنالعان قازاق ءتىلىنىڭ جۇيەلى بازاسى جوق ەكەنى قىنجىلتادى. بۇل جوبانىڭ كوپ ماقساتتارىنىڭ ءبىرى دە وسى - قازاق سوزدەرىنىڭ ەلەكتروندى قورلارىن قالىپتاستىرۋ جانە ەلەكتروندى قورلارداعى سوزدەردىڭ تاكسونومياسىن جاساۋ، قازاق ءتىلىنىڭ ەملەسى بويىنشا جىكتەپ (سينونيمدەر، تۇستەر، ت. س. س. )، توپتاستىرۋ.

جالپىعا قولجەتىمدى ورتادا قازاق ءتىلىنىڭ قورى كوبەيگەن سايىن، ونى پروگراممالار مەن روبوتتاردىڭ ءتۇسىنۋى دە جەڭىلدەي تۇسەدى. سايكەسىنشە بولاشاقتا داۋىس تانۋ، ءامىر بەرۋ جۇيەلەرىن قۇرۋعا بولادى، ءماتىن نەگىزىندەگى قازاق ءتىلدى كومپيۋتەرلىك جانە موبيل ويىندار جاساۋعا بولادى، قازاق اۋديتورياسىنا ارنالعان باسقا دا كومپيۋتەرلىك قۇرالداردى جانە web-تەحنولوگيالاردى دامىتۋعا مۇمكىندىك تۋادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى