قازاقستان مۇسىلمان ەلدەرى اراسىندا تارتىمدىلىعى جاعىنان ۇزدىك وندىققا ەندى
قازاقستان 2019 -جىلعى Global Muslim Travel Index -GMTI رەيتينگى بويىنشا يسلام ىنتىماقتاستىق ۇيىمىنا مۇشە ەلدەر ىشىندە كەلۋشىلەر سانى جاعىنان ۇزدىك 10 ەلدىڭ تىزىمىنە ەندى. بۇل تىزىمدە سونداي- اق ساۋد ارابياسى، تۇركيا، مالايزيا، بىرىككەن اراب امىرلىكتەرى جانە يندونەزيا بار.
بۇدان باسقا، GMTI رەيتينگى يسلام ىنتىماقتاستىق ۇيىمىنا مۇشە جانە مۇشە ەمەس ەلدەردى تارتىمدىلىعى بويىنشا سالىستىرادى. بۇل رەيتينگتە 130 ەل اراسىندا قازاقستان 24- ورىندا، وزبەكستان - 22- ءشى، ازەربايجان - 25- ءشى، ال قىرعىزستان - 29-شى ورىندا. رەيتينگتە يندونەزيا مەن مالايزيا كوش باستاسا، ءۇشىنشى ورىندا - تۇركيا، ودان ءارى تىزىمدە ساۋد ارابياسى جانە ب ا ءا تۇر.
«Kazakh Tourism» ۇلتتىق كومپانياسىنىڭ مالىمەتىنشە، Global Muslim Travel Index - سينگاپۋرلىق CrescentRating جانە Mastercard كومپانياسى بىرىگىپ ازىرلەگەن، تۋريزم سالاسىنداعى جىل سايىنعى يندەكس. رەيتينگتى قۇرۋ كەزىندە ءتۇرلى كريتەرييلەر ەسكەرىلەدى: قولايلى ورتا، قاۋىپسىزدىك، ءدىني شەكتەۋلەر، جانە كەلۋشىلەر سانى دەگەن تارماقتاردى قامتيتىن «قورشاعان ورتا» 30 پايىزعا اسەر ەتسە، مەيرامحانالار، ناماز وقيتىن ورىندار، اۋەجاي، بىرەگەي تۋريستىك تاجىريبە، قوناق ۇيلەر تارماقتارىن قامتيتىن «مۇسىلماندارعا ارنالعان قىزمەتتەر» % 20- دى، بايلانىسۋ قولايلىلىعى، سيفرلىق اقپاراتتىڭ بولۋى، اقپاراتتىق قامتۋ تارماقتارىن قامتيتىن «كوممۋنيكاتسيا» % 20- دى كورسەتسە، كولىكتىك قاتىناس، ۆيزالىق تالاپتار، كولىكتىك ينفراقۇرىلىم تارماقتارىن قامتيتىن «قولجەتىمدىلىك» قالعان % 10- دىڭ كورسەتكىشتەرى.
بۇل رەيتينگ بويىنشا، قازاقستان بايلانىسۋ قولايلىلىعى، سيفرلىق اقپاراتتىڭ بولۋى جانە بىرەگەي تۋريستىك تاجىريبە كريتەرييلەرى بويىنشا جوعارى كورسەتكىشتەرگە يە بولسا، قاۋىپسىزدىك، ناماز وقيتىن ورىندار جانە ءدىني شەكتەۋلەر تارماقتارى بويىنشا كەمشىلىكتەرى بار. ايتا كەتۋ كەرەك، كورشىلەس ەلدەردە دە ءدال وسى كورسەتكىشتەر بويىنشا كەمشىلىكتەر كەزدەسەدى ەكەن.
«مالايزيا، يران، ب ا ءا جانە تاياۋ شىعىس ەلدەرىنىڭ قازاقستانعا قىزىعۋشىلىعى جوعارى. 2018 -جىلدىڭ ناتيجەلەرى بويىنشا بۇل ەلدەردەن كەلۋشىلەر اعىنىنىڭ ءوسۋى بايقالادى. مىسالى ب ا ءا كەلەتىندەردىڭ سانى 50 پايىزعا، مالايزيالىق تۋريستەردىڭ سانى 44 پايىزعا ارتقان. سوندىقتان، بۇل رەيتينگ - ءبىز ءۇشىن ماڭىزدى باعدار»، - دەپ اتاپ ءوتتى «Kazakh Tourism» ۇلتتىق كومپانياسىنىڭ باسقارما ءتوراعاسىنىڭ ورىنباسارى قايرات ءسادۋاقاسوۆ.
ەلدەر رەيتينگىنە قوسا، GMTI مۇسىلمان ەلدەرىنەن كەلۋشىلەر اعىنىن ارتتىرۋ جانە ولار ءۇشىن جاعدايدى جاقسارتۋ جونىندە ۇسىنىس تا بەرەدى. ولار - ادال تاعامداردىڭ، ناماز وقۋ ورىندارىنىڭ بولۋى، قاسيەتتى رامازان ايىندا ارنايى قىزمەتتەردىڭ جۇمىس ىستەۋى جانە ەلدە «حالال ەمەس» قىزمەتتەردىڭ بولماۋى سياقتى بىرنەشە ۇسىنىمدار.
اۆتور: اقەركە داۋرەنبەك قىزى
