نۇر-سۇلتاندا «رامازان كەرۋەنى» جولعا شىقتى
قمدب نۇر-سۇلتان وكىلدىگى «رۋحاني جاستار» ۇيىمىنىڭ ۇيىتقى بولۋىمەن باستالعان يگى باستاماعا قالاداعى 10 قۇلشىلىق ورداسىنىڭ قىزمەتكەرلەرى مەن جاماعاتى، ەرىكتىلەر ۇيىمدارى مەن بەلسەندى ستۋدەنت جاستار، نۇر-سۇلتان قالاسى ءدىن پروبلەمالارىن زەرتتەۋ ورتالىعىنىڭ قىزمەتكەرلەرى جۇمىلا اتسالىسىپ، قايىرىمدىلىق كەرۋەنىنىڭ قاتارىن كوبەيتە ءتۇستى. رەسپۋبليكالىق «ازىرەت سۇلتان» مەشىتىنەن باستاۋ العان «رامازان كەرۋەنىنە» جالپى سانى 80 نەن اسا كولىك قاتىسىپ، الدىن الا تۇزىلگەن ءتىزىم بويىنشا ەلوردامىزداعى 100 مۇقتاج وتباسىعا ازىق-تۇلىك تاراتىلدى.
قاسيەتتى ايداعى قايىرىمدىلىق شاراسىن جانداندىرىپ، جان جىلۋىمەن بولىسۋگە ۇمتىلعان جاماعاتقا ق م د ب ءتوراعاسىنىڭ ءبىرىنشى ورىنباسارى، نايب ءمۇفتي، نۇر-سۇلتان قالاسىنىڭ باس يمامى ناۋرىزباي قاجى تاعان ۇلى ىزگى تىلەگىن ءبىلدىرىپ، اق باتاسىن ارنادى. باس مەشىت اۋلاسىندا جيىلعان جاماعات وسى جەردەن كۇندەلىكتى تۇرمىسقا قاجەتتى ازىق- تۇلىك، ەت سالىنعان «رامازان سومكەلەرىن» تيەپ، كورسەتىلگەن مەكەنجايلارعا كوش تۇزەدى.
«رامازان كەرۋەنىنىڭ» العاشقى كولىگى بالالاردى وڭالتۋ ورتالىعىنىڭ جاتاقحاناسىنا سوعىپ، نايب ءمۇفتي ناۋرىزباي قاجى تاعان ۇلى ءوز قولىمەن «رامازان سومكەسىن» تابىستاپ قايتتى. ەلوردامىزداعى ەرىكتىلەر ۇيىمى مەن قايىرىمدىلىق توپتارىنىڭ تۇگەلدەي باسىن قوسقان ايتۋلى شارا الداعى ۋاقىتتا تاعى دا ۇيىمداستىرىلاتىن بولماق. نۇر-سۇلتان قالاسىنىڭ باس يمامى ناۋرىزباي قاجى تاعان ۇلىنىڭ ايتۋىنشا، مۇنداي قايىرىمدىلىق شارالارى قاسيەتتى رامازان ايى جالعاسىن تاباتىن بولماق.
