باقىت سۇلتانوۆ الەۋمەتتىك نىسانداردى ۋاقىتىندا بەرۋدى تاپسىردى
بۇل تۋرالى قازاقپارات اكىمدىكتىڭ باسپا ءسوز قىزمەتىنە سىلتەمە جاساپ حابارلايدى.
وتىرىستا 2019-2020-جىلدارعا ارنالعان جىلىتۋ ماۋسىمىنا دايىندىق تۋرالى قالا اكىمىنىڭ ورىنباسارى ارمان تۇرلىبەك مالىمدەدى.
ونىڭ ايتۋىنشا، قالانىڭ ەنەرگەتيكالىق جۇيەسىنە كۇردەلى جوندەۋ جۇمىستارى باستالدى. بيىل ۇزىندىعى 3,9 شاقىرىم بولاتىن جىلۋمەن قامتۋ جەلىلەرىن كۇردەلى جوندەۋ جانە 28570 شاقىرىمدىق ەلەكتر جەلىلەرىن رەتكە كەلتىرۋ جوسپارلانۋدا.
«2019-2020-جىلدارعا ارنالعان جىلىتۋ ماۋسىمىنا دايىندىق جانە ونى وتكىزۋگە قاتىستى قالالىق شتاب قۇرىلدى. اۋدان اكىمدەرى اۋداندىق شتابتار قۇرىپ، قىس مەزگىلىندە تۇرعىنداردان كەلىپ تۇسكەن وتىنىشتەردى تۇرعىن ۇيلەرگە قىزمەت كورسەتەتىن پيك جانە باسقا دا ماسەلەلەر بويىنشا جىلۋ بەرۋگە قاتىستى تالداۋ جاساۋ قاجەت»، - دەدى ارمان تۇرلىبەك.
سونداي-اق، اۋدان اكىمدەرى بەلگىلەنبەگەن ورىنداردا جينالعان قوقىستاردى جويۋ بويىنشا جۇمىستى كۇشەيتۋى كەرەك. بۇگىنگى تاڭدا 165 قوقىس ءۇيىندىسىنىڭ 80 ءى شىعارىلدى. الماتى اۋدانىندا - 16، بايقوڭىر اۋدانىندا - 25، ەسىل اۋدانىندا - 15، سارىارقا اۋدانىندا - 24 قوقىس ورنى جويىلدى. تاعى 85 قوقىس ءۇيىندىسى قالىپ وتىر.
باقىت سۇلتانوۆ الداعى جىلىتۋ ماۋسىمىنا مۇقيات دايىندىق جۇرگىزۋ قاجەتتىگىن اتاپ ءوتتى. «قىستىڭ قامىن جاز ويلا» دەگەن حالىق دانالىعى بار. وتكەن جىلىتۋ كەزەڭىندە كوپپاتەرلى تۇرعىن ۇيلەردى جىلىتۋ ماسەلەلەرى بويىنشا تۇرعىنداردان 5 مىڭعا جۋىق ءوتىنىشى كەلىپ ءتۇستى، ونىڭ ىشىندە 2265 ءى جىلۋدىڭ بولماۋىنا قاتىستى. ءبىز قىسقى دايىندىققا ەرەكشە نازار اۋدارۋىمىز كەرەك»، - دەدى قالا اكىمى.
تۇرعىن ءۇي جانە الەۋمەتتىك نىساندار قۇرىلىسى ماسەلەلەرى بويىنشا اكىمنىڭ ورىنباسارى نۇرلان نۇركەنوۆ باياندادى. قالادا 228 كومپانيا تۇرعىن ءۇي سالۋمەن اينالىسادى. «ءبىزدىڭ تالداۋىمىزشا، بۇزىلۋ قاۋپى بار پروبلەمالىق نىساندار بار. بۇل - 336 مىڭ شارشى مەتر نەمەسە ەلوردانىڭ ءتۇرلى اۋداندارىنداعى 24 ت ك. ءبىز ولاردى ەرەكشە باقىلاۋعا الامىز. بيىل ءبىز تاپسىرۋدى جوسپارلاپ وتىرعان 4 الەۋمەتتىك نىسان بويىنشا دا قاۋىپ ءتونىپ تۇر. بۇل - 31№ كوشەسىنىڭ وڭتۇستىگىنە قاراي، نۇرا-ەسىل ارناسىنىڭ شىعىسىنا قاراي ورنالاسقان 1200 ورىندىق مەكتەپ. نىسان دايىن، قاسبەت جۇمىستارى جۇرگىزىلۋدە. قازىر مەكتەپكە اپارار جول دا جوق، سونداي-اق ينجەنەرلىك جەلىلەر دە تارتىلماعان. ءبىز مەكتەپتى سالعانمەن، وعان اپاراتىن جولدار مەن جەلىلەردى دە قوسا سالۋ كەرەك»، - دەدى ول.
باقىت سۇلتانوۆ كولىك جانە جول- كولىك ينفراقۇرىلىمىن دامىتۋ باسقارماسىنىڭ باسشىسى اسحات قاراعويشينگە قىسقا مەرزىمدە ينفراقۇرىلىمدى جەتكىزۋ ءۇشىن بارلىق قاجەتتى شارالاردى قابىلداۋدى تاپسىردى. «شىلدە-تامىز ايلارىندا مۇعالىمدەر جۇمىس ىستەپ، جاڭا وقۋ جىلىنا دايىندالۋى ءتيىس. نىسان شىلدە ايىندا ينجەنەرلىك جەلىلەرمەن بىرگە تاپسىرىلۋى ءتيىس»، - دەپ اتاپ ءوتتى باقىت سۇلتانوۆ.
نۇرلان نۇركەنوۆتىڭ اقپاراتى بويىنشا، قازىرگى تاڭدا نۇر-سۇلتان قالاسىندا 102 الەۋمەتتىك جانە مادەني نىسان، ونىڭ ىشىندە بيۋجەت قاراجاتى ەسەبىنەن 29 نىساننىڭ قۇرىلىسى جۇرگىزىلۋدە. بۇل - 19 مەكتەپ پەن ولارعا جاپسارلاس عيماراتتار، ءبىر بالاباقشا. دەنساۋلىق ساقتاۋ سالاسىنداعى سيفرلاندىرۋ تۋرالى قوعامدىق دەنساۋلىق ساقتاۋ باسقارماسىنىڭ باسشىسى مارات شورانوۆ بايانداما جاسادى. ونىڭ ايتۋىنشا، بۇگىن 083، 086، 094، 095 مەديتسينالىق انىقتامالار، اۋرۋحانالىق پاراقتار مەن مەديتسينالىق كىتاپشالار مەديتسينالىق اقپاراتتىق جۇيەدە تىركەلىپ، بارلىق قالالىق مەديتسينالىق ۇيىمداردا بەرىلەدى.
«قازىرگى ۋاقىتتا اتالعان ماسەلەنى مەملەكەتتىك تاپسىرىس الاتىن جەكە مەديتسينالىق ۇيىمدار اراسىندا جۇزەگە اسىرۋ جۇمىستارى جۇرگىزىلۋدە. سونىمەن قاتار، قازىرگى ۋاقىتتا ق ر دەنساۋلىق ساقتاۋ مينيسترلىگى قاتاڭ ەسەپتىلىك بلانكىلەرىندە ءمورسىز ۋاقىتشا ەڭبەككە جارامسىزدىق پاراعىن بەرۋ ءۇشىن ەلوردالىق دەنساۋلىق ساقتاۋ سالاسىندا پيلوتتىق جوبانى جۇرگىزۋ مۇمكىندىگىن قاراستىرۋدا. بۇل شارا بيۋجەت قاراجاتىن ۇنەمدەۋگە مۇمكىندىك بەرەدى»، - دەدى ول.
سونداي-اق، باسقارما باسشىسى قالالىق مەديتسينا سالاسىنداعى مالىمەتتەردى جينالىپ، تالداۋ جۇرگىزىلەتىن ءبىرىڭعاي سيتۋاتسيالىق ورتالىقتىڭ جۇمىسى تۋرالى ايتتى. وسى رەتتە باقىت سۇلتانوۆ انا ولىمىنە قاتىستى ماسەلەلەرگە ساپالى تالداۋ قاجەتتىگىن اتاپ ءوتتى. «جۇكتى ايەلدەردى الدىن الا شاقىرۋ، ولاردى ەسەپكە قويۋ، ۇنەمى قوڭىراۋ شالۋ قاجەت. زاماناۋي مەديتسينا سالاسىنداعى جوبالاردى جالعاستىرۋ ماڭىزدى»، - دەدى قالا اكىمى.
