قازاقستاندا ون مىڭعا جۋىق ادام دەمىكپەگە شالدىققان
بۇگىندە بۇكىل الەم دەمىكپەگە قارسى كۇرەس كۇنىن اتاپ وتەدى.
دەمىكپە (استما) - اۋىر ينفەكتسيالىق اۋرۋلاردىڭ قاتارىنا جاتادى جانە جۇرەك اۋرۋلارىنان، ينسۋلتتان، وبىر مەن ديابەتتەن كەيىن بەسىنشى ورىندا تۇر.
ادامنىڭ تىنىس الۋ جۇيەسى زات الماسۋى مەن اعزانىڭ تەپە- تەڭدىگىن قامتاماسىز ەتەدى. تىنىس العاندا جاسۋشالار وتتەگىمەن قامتاماسىز ەتىلەدى. وكپە جانە برونحتاردى زاقىمدايتىن اۋرۋلار بار. مۇنداي اۋرۋلاردىڭ ءبىرى - دەمىكپە.
برونح دەمىكپەسى ەرەسەكتەردىڭ %5 جانە بالالاردىڭ %10 زارداپ شەگەتىن ەڭ كوپ تارالعان سوزىلمالى اۋرۋلاردىڭ ءبىرى بولىپ تابىلادى. دسۇ انىقتاماسى بويىنشا بۇكىل الەمدە 235 ميلليون ادام دەمىكپەمەن اۋىرادى.
دۇنيەجۇزىلىك دەمىكپەمەن كۇرەس كۇنى جىل سايىن مامىر ايىنىڭ ءبىرىنشى سەيسەنبىسىندە اتاپ وتىلەدى.
بۇل كۇن د س ۇ باستاماسى بويىنشا قۇرىلعان جانە دەمىكپەمەن سىرقاتتانۋشىلىقتىڭ ءوسۋ پروبلەماسىنا جۇرتشىلىقتىڭ نازارىن اۋدارۋعا، دەمىكپەگە كومەك كورسەتۋ ساپاسىن ارتتىرۋعا جانە ادامداردىڭ بۇل اۋرۋ تۋرالى حاباردار بولۋىنا باعىتتالعان. العاش رەت بۇكىلالەمدىك دەمىكپەگە قارسى كۇرەس كۇنى 1988 -جىلى اتالىپ ءوتتى.
استما گرەك تىلىنەن اۋدارعاندا "اۋىر تىنىس" دەگەندى بىلدىرەدى. بۇل تەرميننىڭ اۆتورى - گيپپوكرات. كوپتەگەن عاسىرلار بويى عالىمدار وسى اۋرۋدىڭ سەبەبىن زەرتتەۋگە تىرىستى جانە تەك 20 عاسىردا دەمىكپەنىڭ سەبەبى، اللەرگيالىق رەاكتسيا، سىرتقى تىتىركەندىرگىشكە (حيميالىق، بيولوگيالىق، فيزيكالىق) جاۋاپ رەتىندە برونحتاردىڭ جەرگىلىكتى قابىنۋى بولىپ تابىلاتىنى انىقتالعان.
قازاقستاندا دەمىكپەمەن اۋىراتىن ادامداردىڭ سانى جىل سايىن ارتىپ كەلەدى. ق ر دسم سوڭعى مالىمەتىنە سايكەس، 100000 ادامعا شاققاندا دەمىكپە كورسەتكىشى 56,3 بولىپ وتىر.
ال بۇل شامامەن 10000 عا جۋىق ادام.
«برونح دەمىكپەسىن دياگنوستيكالاۋ قيىن، سەبەبى ونى ءجىتى جانە سوزىلمالى برونحيتتەرمەن، وكپەنىڭ سوزىلمالى وبسترۋكتيۆتى اۋرۋىمەن، وكپەنىڭ قابىنۋىمەن، تۋبەركۋلەزبەن، باسقا دا رەسپيراتورلىق، نيەۆرولوگيالىق نەمەسە قانتامىر اۋرۋلارىمەن وڭاي شاتاستىرۋعا بولادى. ءدال دياگنوزدى جەدەل دەم شىعارۋ كولەمىن ولشەۋ، برونحيالدى سەكرەت ءاناليزى، اللەرگولوگيالىق تەكسەرۋ جانە ت. ب. تالداۋلار نەگىزىندە قويۋعا بولادى. الايدا، برونح دەمىكپەسىن دياگنوستيكالاۋ مەن ەمدەۋدىڭ زاماناۋي ادىستەرىنىڭ ارقاسىندا باقىلاپ، دۇرىس تاڭدالعان ەم قولدانسا كوپتەگەن پاتسيەنتتەر اۋرۋ سيمپتومدارىنان ارىلۋى مۇمكىن"، - دەيدى ماماندار.
