حوككەيدەن الەم چەمپيوناتى: قازاقستان قۇراماسى تاريحي جەڭىسىنە قول جەتكىزدى

بۇدان بۇرىن حابارلاعانىمىزداي، ەكى قۇراما اتالمىش توپتاعى مىقتىلار قاتارىندا سانالادى. قازاقستان حوككەيشىلەرى الدىمەن سلوۆەنيانى 3:2 ەسەبىمەن تىزە بۇكتىرسە، ودان كەيىن ليتۆانى 3:1 ەسەبىمەن جەڭدى. بەلارۋس قۇراماسى دا بارلىق قارسىلاسىنان باسىم ءتۇستى.

ەكى قۇراما بۇعان دەيىن 11 مارتە كەزدەسكەن بولاتىن. ونىڭ بىردە-بىرىندە ءبىزدىڭ حوككەيشىلەر جەڭىسكە جەتە العان جوق. سوندىقتان بۇگىن قازاقستان قۇراماسى باسىم تۇسسە، ول تاريحي جەڭىس سانالاتىنى ءسوزسىز ەدى.

بۇگىنگى كەزدەسۋدە ءبىزدىڭ جىگىتتەر العاشقى بولىپ ەسەپ اشتى. ونى نيكيتا ميحايليس 6-مينۋتتا شەبەر ورىندادى. ودان كەيىن 16-مينۋتتا تالعات جايلاۋوۆ مەرگەندىك تانىتتى. ءبىرىنشى كەزەڭدى قازاقستاندىق حوككەيشىلەر 2:0 ەسبىمەن جەڭىسپەن اياقتادى. دەگەنمەن، بەلارۋس قۇراماسى تاراپىنان 27-مينۋتتا ارتەم دەمكوۆ جانە 45-مينۋتتا نيكيتا فەوكتيستوۆ شايبا سوعىپ، تارازى باسى تەڭەستى. ويىن سوڭىنا دەيىن 2:2 ەسەبى ساقتالىپ تۇردى. سوندىقتان كەزدەسۋ وۆەرتايمعا ۇلاستى. وۆەرتايمدا ءبىزدىڭ جىگىتتەر جەڭىس شايباسىن سوقتى.

وسىلايشا، قازاقستان قۇراماسى تاريحي جەڭىسىنە جەتتى. سونداي-اق، الداعى جىلى ۇزدىكتەر وينايتىن A ديۆيزيونىندا باق سىناۋعا مۇمكىندىك الدى.

ەستەرىڭىزگە سالا كەتەلىك، ق ر قۇراماسى اتالمىش ديۆيزيوندا سوڭعى رەت 2016-جىلى ويناعان بولاتىن. تاعى ءبىر جولداما بەلارۋس قۇراماسىنا بۇيىردى.

ءتورتىنشى ويىن كۇنىندە، سونىمەن قاتار ليتۆا وڭتۇستىك كورەيانى - 2:1، سلوۆەنيا ۆەنگريانى 6:0 ەسەبىمەن جەڭدى.

سوڭعى تۋر ويىندارى 5- مامىر كۇنى وتكىزىلەدى. بۇل كۇنى سلوۆەنيا مەن ليتۆا، بەلارۋس پەن وڭتۇستىك كورەيا، قازاقستان مەن ۆەنگريا قۇرامالارى كەزدەسەدى.

اۆتور: ءادىلجان ۇمبەت

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى