قازاقستاندىق عالىم جۋساننان كوسمەتيكالىق ءونىم ويلاپ تاپتى
ەرەكشە ونىمدەر ەلوردادا وتكەن وتاندىق وندىرۋشىلەردىڭ 5-كورمەسىندە ۇسىنىلدى، دەپ حابارلايدى قازاقپارات ءتىلشىسى.
بيوتەحنولوگ ساۋلە مۇسايەۆا تاۋ مەن دالا شوپتەرىنەن، ارپا مەن سۇلىدان ەمدىك كوسمەتيكا جاساۋدى قولعا العان. كىلەڭ قازاقشا اتاۋى بار كوسمەتيكالىق ونىمدەرگە اسىرەسە نازىك جاندىلار ۇلكەن قىزىعۋشىلىق تانىتۋدا.
«جۋساننىڭ ەمدىك قاسيەتى تۋرالى كوپتەگەن زەرتتەۋلەر بار. سولارعا سۇيەنە وتىرىپ، ونى بىرنەشە كوسمەتيكالىق ءونىمنىڭ قۇرامىنا قوستىق. شاشقا ارنالعان ەمدىك سۋسابىن مەن بەتكە ارنالعان جاقپا شىرىندى دالا جۋسانى پايدالى فەرمەنتتەرمەن بايىتاتىنىن دالەلدەپ شىقتىق. ال جۋساندى جانتاقپەن ارالاستىرىپ، ىشەك قۇرىلىسىن تازارتاتىن ۇنتاق ويلاپ تاپتىق» - دەيدى كاسىپكەر زاۋرە مۇسايەۆا.
كورمە بارىسىندا تابيعي ونىمدەرگە جەلىلىك ساۋدا كومپانياسى قىزىعۋشىلىق تانىتىپ، قازاقستان بويىنشا تاراتىپ ساتۋعا ۇسىنىس ءبىلدىرىپتى.
«قازاقستاندىق ونىمدەردىڭ پايدالى تۇستارى كوپ. مىسالى جاپونياعا قونىس اۋدارعان كەيبىر جەرلەستەرىمىز ءبىزدىڭ ونىمدەردى تاپسىرىسپەن العىزىپ تۇرادى. استانانىڭ جەلىنەن بەتىن قورعاعىسى كەلگەن ايەلدەر دە ءجيى كەلىپ ءجۇر. الماتىدا دا ساۋدا نۇكتەمىز بار. ءبىزدىڭ ونىمدەردىڭ ەۋروپالىق بالامالارى 20-30 ەسەگە قىمبات. ال اسەرى بىردەي. قازىر ءوندىرىس جارتىلاي اۆتوماتتى رەجيمدە جۇمىس ىستەپ تۇر» - دەيدى زاۋرە مۇسايەۆا.
