ءاپسانا: ءۇنسىز جەڭىستىڭ سىرى
ءدال سول كەزدە ونىڭ قاسىنا اۋىلدىڭ بايى جەتىپ كەلەدى. كەدەي بايلاعان ات اعاشقا ول دا اتىن بايلايدى.
- اتىڭىزدى انا اعاشقا بايلاماڭىز، اتىم تىم اساۋ، اتىڭىزدى تەۋىپ جىبەرۋى مۇمكىن، - دەيدى الگى كەدەي وعان.
- اتىمدى قايدا بايلاۋ ءوز ەركىمدە، جۇمىسىڭ بولماسىن، - دەيدى دە، ول دا اسقا وتىرادى.
كوپ وتپەي جىلقىنىڭ شىڭعىرعان داۋىسى شىعادى. ەكى ات تەبىسە جونەلەدى. ەكەۋى دە جۇگىرەدى. ءبىراق ولار بارعانشا كەدەيدىڭ اتى بايدىڭ اتىن تەۋىپ ولتىرەدى.
- اتىڭنىڭ قىلعان قىلاپاتىن كوردىڭ بە؟ ات تولەيسىڭ ماعان! - دەپ بايەكەڭ ايعايعا باسادى.
ەكەۋى كەلىسە الماي، قازىنىڭ الدىنان ءبىر-اق شىعادى.
- سەنىڭ اتىڭ انانىڭ اتىن تەۋىپ ولتىرگەنى راس پا؟ - دەپ سۇرايدى قازى.
كەدەي جۇمعان اۋزىن اشپايدى. قازى كەدەيدى تاعى دا سۇراققا تارتادى. كەدەي سول بەتى جاق اشىپ جاۋاپ بەرمەي قويادى. امالى تاۋسىلعان قازى:
- بۇعان نە شارا؟ ول ءوزى سويلەي المايتىن مىلقاۋ ەكەن، - دەيدى.
تاڭ- تاماشا بولعان باي: «العاش كەزىككەندە سارناپ تۇرعان بولاتىن» دەيدى.
«ول نە دەدى؟ راس پا؟» دەپ سۇرادى قازى.
- ارينە، راس! ول ماعان «اتىڭدى اتىممەن بىرگە بايلاما، اتىم اساۋ ات، ەگەر بىرگە بايلاساڭ، ول سەنىڭ اتىڭدى تەۋىپ ءولتىرۋى مۇمكىن» دەگەن.
- ءماسساعان، - دەيدى قازى، - ەندەشە سەنىكى ءجون ەمەس، ويتكەنى ول الدىن الا ساعان ەسكەرتىپتى عوي. سوندىقتان، ول اتىڭدى تولەمەيدى.
قازى سىرتقا شىققان سوڭ:
- سۇراقتارىما نەگە جاۋاپ بەرمەدىڭ؟ - دەپ سۇرايدى.
- باي- ماناپتاردىڭ ۇشان- تەڭىز سوزىنە سەنسەڭىز دە، جارلىنىڭ سوزىنە سەنەتىن زامان ەمەس ەكەنىن بىلەم عوي. سوندىقتان شىندىقتى ونىڭ وزىنە ايتقىزعىم كەلدى. سوسىن بارىنە كوزىڭىز جەتكەن جوق پا؟! - دەپ جاۋاپ بەرەدى كەدەي.
