ازيا چەمپيوناتى كوپتەگەن قاتەلىكتەردىڭ بەتىن اشتى - بوكستان باس باپكەر
كوماندا مۇشەلەرىنىڭ ازياداعى اياق الىسىنا قانداي باعا بەرەمىز؟ جاس بوكسشىلاردىڭ توپ جارىپ، تاجىريبەلى سپورتشىلاردىڭ تۇعىردان كورىنبەۋىنە نە سەبەپ؟ بۇل تۋرالى ۇلتتىق قۇرامانىڭ باس باپكەرى عالىمبەك كەنجەبايەۆ تولىعىراق ايتىپ بەردى، دەپ حابارلايدى Olympic.kz.
قۇرلىق دوداسىنىڭ دەڭگەيى بيىك
ازيا چەمپيوناتىنىڭ دەڭگەيى جىل سايىن ارتا تۇسۋدە. وسى جولى سوعان تاعى دا كوزىم جەتتى. اسىرەسە، ءۇندىستان كومانداسى قارقىنىن كوبەيتىپ، وزبەكستان بۇرىنعى الەۋەتىن ارتتىرا تۇسكەن. سونداي-اق، تاجىكستان بوكسشىسى تۇڭعىش رەت ازيا چەمپيونى اتانىپ، تاجىريبەلى تايلاندتىقتار مەدالسىز قالدى. مۇنىڭ ءبارى بوكستىڭ بارلىق ەلدە قانات جايىپ، باسەكەلەستەر قاتارى مولايعانىن كورسەتەدى. وڭتۇستىك كورەيا سپورتشىلارىن دا ەسەپتەن شىعارۋعا بولمايدى. بۇل بىرىنشىلىك ءبىزدىڭ ءبىراز قاتەلىگىمىزدى كورسەتتى. مويىنداۋ كەرەك، ءالى كەمشىلىگىمىز بار. ەندى سولاردىڭ الدىن الۋعا تىرىسامىز.
لەۆيت تازا جەڭىلدى
بانگكوك شارشى الاڭىندا ءبىزدىڭ تاجىريبەلى ەكى بوكسشىمىز جانكۇيەر ۇدەسىنەن شىققان جوق. 56 كەلىدەگى الەم چەمپيونى قايرات ەراليەۆ ءوزىنىڭ بابىندا ەمەستىگىن كورسەتتى. ۆاسيلي لەۆيت جارتىلاي فينالدا نوكداۋنمەن جەڭىلدى. لەۆيتتىڭ جەڭىلىسى كوپشىلىك اراسىندا كوپ پىكىر تۋدىرعانىمەن، ونىڭ تازا ۇتىلعانىن مويىنداۋ قاجەت. ويتكەنى، بۇل - بوكس. ەستەن تاندىراتىن سوققىنى كەز كەلگەن بوكسشى الۋى مۇمكىن. ول ءۇشىن جاس نەمەسە تاجىريبەلى بولۋدىڭ قاجەتى جوق. لەۆيت قارسىلاسىنىڭ اۋىر سوققىسىن جىبەرىپ الدى دا، جەڭىلىس تاپتى. سپورتشىنىڭ جاسى ۇلكەيگەن سايىن جەڭىسكە جەتۋدىڭ قيىنداپ كەتەتىنىن دە ۇمىتپاۋ قاجەت.
91 كەلىدە ۆاسيليدىڭ ءىزىن باساتىن بوكسشىلار جوق ەمەس. ءبىراق ولارعا ءالى ءبىراز ەڭبەكتەنۋ كەرەك. قازاقستان چەمپيوناتىندا بەكزات نۇرداۋلەتوۆ فينالعا دەيىن سۇرىنبەي، اقتىق سىندا ۆاسياعا جول بەردى. دەمەك، ول وسى سالماقتاعى ەلىمىزدىڭ ەڭ مىقتى بوكسشىسى. سونداي-اق، جاس وسپىرىمدەر وليمپياداسىنىڭ جەڭىمپازى ايبەك ورالباي دا تالانتتى سپورتشىلاردىڭ ءبىرى. ءبىراق ول ءالى ۇلكەن جارىستارعا تۇسكەن جوق. لەۆيتپەن دە رەسمي تۇردە جولىقپادى.
ازيا بىرىنشىلىگىنە الىپ بارعان ارداگەر بوكسشىلاردىڭ ىشىندە زاكىر سافيۋلليندى ەرەكشە اتاپ وتكىم كەلەدى. تاجىريبەلى ءارى وتە ەڭبەكقور جىگىت. فينالدا جەڭىلسە دە، وسى سالماقتا ەلىمىزدەگى ەڭ ۇزدىك بوكسشىسى بولىپ تۇر.
تورەشىلەر بەدەلگە قارايدى...
75 كەلىدەگى تۇرسىنباي قۇلاحمەت ءوز مانسابىندا العاش رەت ازيا چەمپيونى اتاعىن يەلەنىپ، ەلىمىزدىڭ ءانۇرانىن شىرقاتتى. ول وزبەكستاندىق يسرايل مادريموۆتى جەڭگەنىن ءبارىڭىز بىلەسىزدەر. وسى جەكپە-جەكتەن كەيىن وزبەك تاراپى تورەشىلەر شەشىمىمەن كەلىسپەي، سارى قاعاز كورسەتتى. نەگىزى، قارسىلىق تانىتىپ، سارى قاعاز كورسەتۋ جۇيەسى ءالى رەسمي تۇردە جۇزەگە اسقان جوق. АІВА بۇل جۇيەنى الەم چەمپيوناتىنان باستاپ قولدانىسقا ەنگىزۋى مۇمكىن. سول سەبەپتى، قۇرلىق بىرىنشىلىگىندە سىناقتان وتكىزۋ ماقساتىمەن بارىمىزگە ەكى سارى قاعازدان بەردى. ياعني، كۇمان تۋدىرعان ەكى كەزدەسۋگە ءبىز قارسىلىق تانىتىپ، اپپەلياتسيا بەرە الامىز. بانگكوكتە ءبىز سارى قاعازعا جۇگىنگەن جوقپىز.
ال وزبەكستان باپكەرلەرىنىڭ مادريموۆ جەڭىلىسىمەن كەلىسپەۋى ورىنسىز. تورەشىلەر 4:1 ەسەبىمەن جەڭىستى بىزگە بەردى. دەمەك، قۇلاحمەت ءوز مىقتىلىعىن دالەلدەپ وتىر. قارسىلاستاردىڭ ءدال بۇلاي ارەكەت ەتۋىنە يسرايلدىڭ بەدەلى دە اسەر ەتكەن شىعار. ويتكەنى، مادريموۆ وزبەكستان قۇراماسىنىڭ كوشباسشىسى، بەت-بەينەسى سانالادى. ا ق ش- تا كاسىبيلەر اراسىندا جۇدىرىقتاسىپ ءجۇر. سونداي تانىمال بوكسشىنىڭ تۇرسىنباي سىندى جاس سپورتشىدان جەڭىلگەنى ولاردىڭ شىمبايىنا باتقان شىعار. كەيىن مادريموۆتى قوناق ۇيدە كوردىك. بەت-اۋزىنا ءبىزدىڭ بالانىڭ ءبىراز سوققىلارى تيگەن، جاراقاتى كوپ ەكەن.
جالپى، مۇنداي كەزدەسۋلەردەن سوڭ سارى قاعاز كورسەتۋ ارقىلى وزبەكستان تاراپى تورەشىلەرگە ىقپال جاساۋدا. بۇگىندە اۋەسقوي بوكس الەمىندە وزبەك بوكسشىلارىنىڭ بەدەلى مىقتى بولىپ تۇر. تەڭ دەڭگەيدە وتكەن جەكپە-جەكتى تورەشىلەر وزبەك بوكسشىسىنىڭ پايداسىنا شەشەدى. АІВА دا ولارعا وڭ كوزبەن قارايتىنىن ءبارىڭىز بىلەسىزدەر. سوندىقتان، مۇنداي جەكپە-جەكتەردە ايقىن باسىمدىقپەن جەڭۋ قاجەت.
بەككە بوساڭسۋعا بولمايدى...
81 كەلىدە ازيا چەمپيونى اتانعان بەك نۇرماعامبەتكە ءالى كوپ ەڭبەكتەۋ قاجەت. ونىڭ سالماعىنداعى ۇزدىك بوكسشىلار نەگىزىنەن ەۋروپا مەن امەريكادا. وزبەكستان قۇراماسىنىڭ ۇزدىگى بەكتەمىر مەليكۋزيەۆ تە بيىلعى ازيا دوداسىنان سىرت قالدى. سوندىقتان، بەككە قاتەلىكتەرمەن جۇمىس ىستەگەن دۇرىس.
الەم چەمپيوناتىنا اتتاناتىن قۇرام پرەزيدەنت كۋبوگىندا انىقتالادى
ەرتەڭ قىزىلوردا قالاسىندا بوكستان قازاقستان سپارتاكياداسى باستالادى. اتالعان سىندا جاستاردىڭ دەڭگەيىن بايقاپ كورەمىز. ازيا چەمپيوناتىنا قاتىسقان قۇرام جارىستان بوساتىلدى. سودان سوڭ، پرەزيدەنت كۋبوگى دوداسى كۇتىپ تۇر. سول باسەكەدە الەم چەمپيوناتىنا قاتىساتىن قۇرام تولىعىمەن انىقتالادى. 75 كەلىدەگى ءابىلحان امانقۇل مەن تۇرسىنباي قۇلاحمەت، 69 كەلىدەگى ابىلايحان ءجۇسىپوۆ پەن اسلانبەك شىمبەرگەنوۆتەر اراسىنداعى جەڭىمپازدار الەمدىك سىنعا جولداما الماق.
