ەلوردادا ۇلاربەك نۇرعالىم ۇلىنىڭ «داياعاششى» كىتابى تانىستىرىلدى
اتالعان ءىس-شاراعا قازاق ۇلتتىق ونەر ۋنيۆەرسيتەتىنىڭ پروفەسسورى نازيرا مۇقىشەۆا، بەلگىلى عالىم شەرۋباي قۇرمانباي ۇلى، جازۋشى كادىربەك قۇنىپيا ۇلى، داۋلەتكەرەي كاپ ۇلى، سەرىكزات دۇيسەنعازى سەكىلدى بەلگىلى اقىن-جازۋشىلار قاتىسىپ، ۇلاربەك نۇرعالىم ۇلىنىڭ شىعارماشىلىعى تۋرالى قۇندى پىكىرلەرىمەن ءبولىستى.
«جالپى، ۇلاربەك نۇرعالىم ۇلىنىڭ شىعارماشىلىعى تۋرالى وسىعان دەيىن دە ءتۇرلى ب ا ق-تا جاريالانعان تۋىندىلارىنان تانىپ، ءبىلىپ ءجۇرمىز. ءبىز، اقىن-جازۋشىلار جاسىراتىنى جوق، وزىمىزدەن كەيىنگى بۋىننىڭ شىعارماشىلىعىنداعى جاڭالىقتاردى كەشىرەك اڭعارىپ، سيرەك وقيمىز. مەن دە سول «داستۇرگە» باعىنىپ جۇرسەم دە، ۇلاربەكتىڭ جازعاندارىنا نازار اۋدارىپ، ىزدەپ وقيمىن. ونىڭ «داياعاششى»، «ءسوز تاپقانعا قولقانىڭ قانداي قاتىسى بار؟»، «قازاق ءاندى قالاي تىڭداعان؟» سياقتى كوپتەگەن تانىمدىق ماقالالارى مەنىڭ كوڭىلىمنەن شىقتى. مۇندا قازاقتىڭ شىنايى تۇرمىس-سالتى، مادەنيەتى، تىرشىلىك داعدىسى انىق سۋرەتتەلەدى. قازاقتىڭ ازاماتى رەتىندە كوشپەلى ءومىردى باسىنان كەشە وتىرىپ، شىعارماسىندا ونى تەرەڭ تولعاپ، شىنايى سەزىنىپ جازعان. جانە ونى بۇگىنگى قازاق قوعامىنداعى ءمانى مەن ماڭىزىن، ۇلگىسى مەن ونەگەسىن سالماقتاپ، تارازىلاپ، وقىرمانعا تۇسىنىكتى تىلمەن جەتكىزە بىلگەن. سوندىقتان، بۇل كىتابىن وقىرمان ىزدەپ ءجۇرىپ وقيتىن كىتاپ دەپ باعالايمىن»، - دەدى فيلولوگيا عىلىمدارىنىڭ دوكتورى، پروفەسسور شەرۋباي قۇرمانباي ۇلى.
اقىن، سىنشى، «رۋح» حالىقارالىق ادەبي بايقاۋىنىڭ جۇلدەگەرى ۇلاربەك نۇرعالىم ۇلىنىڭ «داياعاششى» كىتابىنا قازاقى ناقىشقا قانىق ەسسە، اڭگىمە جانە ماقالالارى توپتاستىرىلعان. قالامگەر شىعارمالارىنىڭ بارىندە دەرلىك ۇلتتىق بولمىستىڭ ۇستىندى سيپاتتارىن ءسوز ەتەدى. بۇل كىتاپقا «ايتۋعا بولمايدى»، «اتاجۇرتقا كەلۋىم ءبىر حيكايا»، «جۇرتبايەۆتاعى جۇرناق»، «ءسوز تاپقانعا قولقانىڭ قانداي قاتىسى بار؟»، «اباي ايتقان ولمەيتۇعىن ءسوز»، «قازاق ءاندى قالاي تىڭداعان؟»، «قىران مەن قازاق»، «قايعىنىڭ ەمى نەمەسە كەكىلبايەۆقا كوڭىلقوس ايتۋ»، تاعى باسقا شىعارمالارى ەنگەن.
ەستەرىڭىزگە سالا كەتەيىك، «Eurasian Book Fair-2019»- ەۋرازيالىق حالىقارالىق كىتاپ كورمە- جارمەڭكەسى ەلىمىزدەگى ىسكەرلىك جانە گۋمانيتارلىق ارىپتەستىكتى دامىتۋ جانە نىعايتۋ ماقساتىندا تمد، ەۋروپا جانە ازيا ەلدەرىنىڭ باسپا، كىتاپ ساۋداسى ۇيىمدارىن، مادەني جانە ءبىلىم بەرۋ ورتالىقتارىن ۇلكەن زياتكەرلىك الاڭعا بىرىكتىرەتىن اسا ءىرى كىتاپ فورۋمى.
بۇل كورمەگە 13 مەملەكەتتەن كەلگەن 90 كومپانيا قاتىسۋدا. ونىڭ ىشىندە رەسەي، ازەربايجان، تاجىكستان، ارمەنيا، قىرعىزستان، تۇركيا، قىتاي، يران، پولشا، بەلگيا، لاتۆيا، ۋكراينا، وزبەكستان بار.
جاستار جىلى اياسىندا جاس اۆتورلاردىڭ قاتىسۋىمەن «اشىق اڭگىمە» اقىندىق مارافونى، كىتاپ تۋرالى اڭگىمەلەسۋ (book talks)، ادەبيەت كلۋبىنىڭ وتىرىسى، «كىتاپتى قالاي ءتيىمدى وقۋ كەرەك؟» تاقىرىبىنا ارنالعان شەبەرلىك سىنىپتارى، تانىمال اقىن-جازۋشىلارمەن اۆتوگراف-سەسسيالارى ۇيىمداستىرىلىپ جاتىر.
اۆتور: باقىتجول كاكەش
