شىعىستى الاڭداتقان التى ماسەلە: قاسىم- جومارت توقايەۆ ۇكىمەت پەن اكىمدىككە تاپسىرمالار بەردى
«جالپى العاندا، ايماق الەۋمەتتىك- ەكونوميكالىق دامۋدىڭ نەگىزگى كورسەتكىشتەرى بويىنشا ايتارلىقتاي ناتيجەگە قول جەتكىزدى. مەن وبلىس باسشىلىعىنىڭ نازارىن بىرنەشە پرينتسيپتى ماسەلەلەرگە اۋدارعىم كەلەدى» ، - دەدى مەملەكەت باسشىسى.
ءبىرىنشى ماسەلە - حالىقتى جۇمىسپەن قامتۋ جانە بيزنەستى قولداۋ. پرەزيدەنتتىڭ ايتۋىنشا، تۇراقتى جۇمىس ورىندارىن قۇرۋ، ءونىمدى جۇمىسپەن قامتۋدى دامىتۋ جانە كاسىپكەرلىك باستاماعا قولداۋ كورسەتۋ - ءالى دە وزەكتى بولىپ وتىر.
«سوندىقتان، مەن ءۇشىن اكىمدەر جۇمىسىنىڭ تيىمدىلىگىن باعالاۋدىڭ نەگىزگى ولشەمى - جاڭا جۇمىس ورىندارىنىڭ سانى، جالاقى دەڭگەيى مەن ەڭبەك جاعدايلارى. وبلىستىڭ باسشىلىعى وسى باعىتتاعى جۇمىس تيىمدىلىگىن ايتارلىقتاي جاقسارتۋى ءتيىس. قازىرگى ۋاقىتتا ايماقتىق ەكونوميكاداعى شاعىن جانە ورتا بيزنەس ۇلەسى %16 قۇرايدى. بۇل وڭىرلەر اراسىنداعى ورتاشا كورسەتكىش» ، - دەدى ول.
مەملەكەت باسشىسى ايتقان ەكىنشى ماسەلە - ءومىر ساپاسىن جاقسارتۋ جانە جايلى ءومىر ورتاسىن قۇرۋ. وسى باعىتتا وڭىردە كوپ جۇمىس اتقارىلدى. دەگەنمەن، ق. توقايەۆ قارقىندى ۇلعايتىپ، جيناقتالعان تاجىريبەنى بارىنشا كەڭەيتىپ، ءتىپتى وبلىستىڭ ەڭ شالعاي اۋداندارىن دا ەسكەرۋدى تاپسىردى.
«ۇشىنشىدەن - تۋريستىك ينفراقۇرىلىمدى دامىتۋ قاجەت. قازىرگى جاعدايدا تۋريزم يندۋسترياسى - ەكونوميكالىق ءوسۋدىڭ ماڭىزدى درايۆەرلەرىنىڭ ءبىرى جانە جاڭا جۇمىس ورىندارىن قۇرۋ كوزى بولىپ وتىر. وتكەن جىلى كوپتەگەن قازاقستاندىقتار الاكولدە دەمالۋدى ۇيعاردى، ءبىراق قىزمەت كورسەتۋدىڭ لايىقتى دەڭگەيىن كورە المادى. حالىق جەرگىلىكتى جولدىڭ ناشار كۇيىنە شاعىمداندى. وسىعان بايلانىستى شىعىس قازاقستان مەن الماتى وبلىستارىنىڭ اكىمدەرى از ۋاقىتتا جول جوندەۋ مەن ءتيىستى قىزمەت كورسەتۋ ماسەلەلەرىن شەشۋى ءتيىس» ، - دەدى ق. توقايەۆ.
پرەزيدەنت جالپى كولىكتىك- لوگيستيكالىق ينفراقۇرىلىمدى دامىتۋعا ەرەكشە كوڭىل ءبولۋدى تاپسىردى. بۇل ىشكى ءتۋريزمنىڭ الەۋمەتتىن ارتتىرۋعا سەپتىگىن تيگىزەدى.
«رۋحاني جاڭعىرۋ» باعدارلاماسىندا انىقتالعان وڭىردەگى كيەلى ورىندارعا تۇرعىندار مەن تۋريستەردىڭ قولجەتىمدىلىگىن قامتاماسىز ەتۋ جۇمىستارىن جالعاستىرۋ كەرەك. بۇل جەردە بۇگىن ءوزىم بارىپ، حالقىمىزدىڭ ۇلى ويشىلىنا تاعزىم ەتكەن ۇلى ابايدىڭ وتانى - جيدەباي قونىسىن ايتۋعا بولادى. بۇل ورىنعا جوعارى مارتەبە بەرىپ، رەسەيدەگى پۋشكيننىڭ وتانى، ۇلى بريتانياداعى شەكسپيردىڭ، گەرمانياداعى گەتەنىڭ وتانى سەكىلدى ءتاۋ ەتەتىن تانىمال ورىنعا اينالدىرۋ كەرەك» ، - دەپ ءوز ءسوزىن جالعادى پرەزيدەنت.
ءتورتىنشى ماسەلە رەتىندە ق. توقايەۆ ءوڭىردىڭ ەكولوگيالىق جاعدايىن جاقسارتۋدى اتادى.
«سەمەي پوليگونىنىڭ بىزگە قانداي قايعىلى «مۇرا» قالدىرعانىن ءارقاشان ەستە ساقتايمىز. اسىرەسە قان اينالىمى جۇيەسى مەن قاتەرلى ىسىك اۋرۋلارى الاڭداتادى. وسى اۋرۋلاردىڭ وڭىردەگى كورسەتكىشتەرى ورتاشا رەسپۋبليكالىق دەڭگەيدەن 1,5 ەسەگە استى. وبلىستا اتموسفەراعا لاستاۋشى زاتتار كوپ بولىنەدى، بۇل حالىقتىڭ دەنساۋلىعى مەن ءال- اۋقاتىنا كەرى اسەرىن تيگىزەدى. وسىعان بايلانىستى مەن ۇكىمەت پەن شىعىس قازاقستان وبلىسىنىڭ اكىمدىگىنە ۇكىمەتتىك ەمەس ۇيىمدارمەن جانە ءتيىستى كاسىپورىندارمەن بىرلەسىپ، ايماقتاعى قورشاعان ورتا ساپاسىن جاقسارتۋ شارالارىن جۇزەگە اسىرۋدى تاپسىرامىن» ، - دەدى ول.
بەسىنشى ماسەلە - ازاماتتارعا الەۋمەتتىك قولداۋ كورسەتەتىن مەملەكەتتىك جۇيە تيىمدىلىگىن ارتتىرۋ.
«حالىقتىڭ الەۋمەتتىك قورعالماعان توپتارىنا اتاۋلى الەۋمەتتىك كومەكتى كەشىكتىرۋ مەن قاعازباستىلىققا جول بەرىلمەۋى ءتيىس. كەشە مەن ۇكىمەتكە جانە ءوز اكىمشىلىگىمە اكىمدەرمەن بىرلەسىپ، جاعدايدى تۇزەتۋ ءۇشىن شۇعىل شارالار قابىلداۋدى تاپسىردىم. ەگەر كەلەسى اپتادا بۇل ماسەلە شەشىمىن تاپپاسا، كىنالىلەر جازالانادى» ، - دەدى مەملەكەت باسشىسى.
جانە ۇيلەسىمدى جانە ءادىل قوعام قۇرۋدى قاسىم- جومارت توقايەۆ التىنشى ماسەلە دەپ اتاپ ءوتتى.
«جاقىندا حالىقپەن كەرى بايلانىس ورناتۋ ءۇشىن وبلىس اكىمدەرىنە ازاماتتاردىڭ وتىنىشتەرىنە جەدەل جاۋاپ بەرۋگە جانە الەۋمەتتىك جەلىدە بەلسەندى بولۋعا شاقىردىم. ادامدار بيلىكتەن ادىلدىكتى كۇتەدى جانە وزدەرىنىڭ ماڭىزدى ماسەلەلەرىن شەشكەندى قالايدى. جەرگىلىكتى بيلىك ايماقتاعى حالىقتى الاڭداتقان ماسەلەلەردەن حاباردار بولۋى كەرەك. ماسەلەن، قازىر وڭىردەگى ەڭ وزەكتى ماسەلە - اۆتوكولىك يەلەرىنە قىزمەت كورسەتۋ ورتالىعىنىڭ جوقتىعى. ۇكىمەت پەن وبلىس اكىمىنە وسى ماسەلەنى شەشۋ ءۇشىن بارلىق شارالاردى قابىلداۋدى تاپسىرامىن» ، - دەدى پرەزيدەنت.
