ۇيدە جۇمىس اتموسفەراسىن جاساۋ جانە ونى ساقتاۋ قۇپيالارى
وزىڭىزگە تانىس ءتورت قابىرعادان جالىعىپ كەتپەۋدىڭ جانە مامان رەتىندە تيىمدىلىگىڭىزدى جوعالتىپ الماۋدىڭ ادىستەرىن ۇسىنامىز.
جۇمىس ورنىن جاساپ الىڭىز ۇيدە ءتيىمدى جۇمىس جاساۋدىڭ ءبىرىنشى جانە باستى ەرەجەسى - دۇرىس جايلاستىرىلعان جۇمىس ورنى. ارينە، بارلىق ادامدا بىردەي شەتەلدىك فيلمدەردەگىدەي جۇمىسقا ارنالعان بولەك بولمەلى بولۋعا مۇمكىندىگى جوق. ءبىراق ۇساق- تۇيەكتەن تازارتىلعان ۇستەل مەن ىڭعايلى ورىندىق، سونىمەن قاتار جۇمىسقا قاجەتتى بلوكنوت، قالام، مامانداعىڭىزعا بايلانىستى پايدالى كىتاپ سەكىلدى زاتتار كەرەك. دۇرىس جايلاستىرىلعان جەر باسقا نارسەگە الاڭداماي، جۇمىسقا جىلدامىراق زەيىن قويۋعا كومەكتەسەدى. بۇل ەرەجە گاردەروبقا دا تىكەلەي قاتىستى: ۇيىقتاۋعا كيەتىن پيجامامەن جۇمىس ۇستەلىنە وتىرماعان ءجون. جۇمىس پروتسەسىنە ەنىپ كەتۋ ءۇشىن رەسميگە جاقىن كيىنىپ العانىڭىز دۇرىس.
جۇمىستى تاڭەرتەڭنەن باستاڭىز ۇيدە جۇمىس جاساساڭىز دا، تۇسكە دەيىن ۇيىقتاپ جاتا بەرمەڭىز. ءوزىڭىزدى قولعا الىپ، جۇمىسقا تاڭەرتەڭ ەرتەمەن كىرىسۋگە تىرىسىڭىز. جۇمىستى قانشالىقتى ەرتە باستاساڭىز، سونشالىقتى ەرتە اياقتايسىز. شارۋالاردى سوڭعى ساتكە قالدىرا بەرۋ كەڭسەدە دە، ۇيدە دە بىتپەيتىن جالقاۋلىققا الىپ كەلەدى.
جۇمىستار ءتىزىمىن جاساڭىز ادام كەڭسەدە وتقاندا جۇمىستان باسقا ەشتەڭەمەن اينالىسۋعا مۇمكىندىگى بولماعاندىقتان قالاي بولعاندا دا ونىڭ «جاۋىنگەرلىك رۋحى» ويانادى. ال ۇيدە جۇمىس جاساۋ كەزىندە قانداي دا ءبىر تاپسىرمانى وتكىزىپ جىبەرسەڭىز، سىزگە ول تۋرالى ەسكەرتىپ وتىراتىن ادام جوق. سوندىقتان كۇندە كەشكىسىن نەمەسە تاڭەرتەڭ ەرتەمەن ءبىر كۇنگە ارنالعان جوسپار قۇرىپ، ءبىرىنشى كەزەكتە جانە ودان كەيىن نە ىستەۋ كەرەك ەكەنىڭىزدى جازىپ قويىڭىز. بۇل ەش تاپسىرمانى ۇمىت قالدىرماۋعا كومەكتەسەدى.
تىنىعۋعا ۋاقىت ءبولىڭىز كۇندىك جوسپارىڭىزعا مىندەتتى تۇردە جۇمىس ءۇزىلىسىن دە ەنگىزۋ كەرەك. بۇل ارينە، ءبىرىنشى كەزەكتە دەمالۋعا قاجەت. ءبىراق، سونىمەن قاتار سول ۋاقىتتى الەۋمەتتىك جەلىگە بولۋگە بولادى. ايتپەسە، الەۋمەتتىك جەلىگە ۇنەمى الاڭداي بەرەتىن بولاسىز. كەڭسەدە ۇيالى تەلەفونمەن ۇزاق الاڭداۋىڭىزعا باستىعىڭىز بەن ارىپتەستەرىڭىز مۇمكىندىك بەرمەيدى، ال ۇيدە جۇمىستارىڭىزدى ۇمىتىپ، وعان بارلىق ۋاقىتىڭىزدى كەتىرۋ قاۋپى بار. سوندىقتان وزىڭىزگە تالاپ قويىڭىز: ۇيالى تەلەفوندى تەك ۇزىلىستە پايدالانعان ءجون.
ءۇي شارۋالارىنا الاڭداماڭىز جاقىندارىڭىزعا ۇيدە جۇمىس جاساۋدىڭ دا كادىمگى جۇمىس ەكەنىن ايتىپ ءتۇسىندىرۋ ماڭىزدى. سوندىقتان ءۇي شارۋالارىنا الاڭداي بەرۋگە بولمايدى. باستاپقىدا قيىن بولادى، وتباسى مۇشەلەرى ءجيى ءوتىنىش ايتادى، مازاڭىزدى الادى. الايدا ولارعا دۇرىستاپ تۇسىندىرسەڭىز، سوعان ۇيرەنە باستايدى.
جۇمىستان تىس ۋاقىتتى قالاي وتكىزەتىنىڭىزدى ويلانىڭىز كەڭسەدە جۇمىس جاساعان كەزدە قالاي دەسە دە سىرتقا شىعاسىز. كەڭسەدەن ۇيگە قايتقان كەزدە جولدا دۇكەنگە سوعاسىز، كينوعا بارىپ قالۋىڭىز مۇمكىن نەمەسە دوستارىڭىزبەن كەزدەسەسىز. ۇيدە وتىرعان ادام وسىنىڭ بارىنەن قۇر قالعانداي كورىنەدى. الايدا تەك كاسىبي مىندەتتەرىڭىزبەن عانا اينالىسۋعا بولمايدى. باستاپقىدا ەرىنسەڭىز دە، اپتالىق جوسپار جاساۋدى ادەتكە اينالدىرۋ كەرەك: وعان جاقىن جەردەگى ساياباققا بارىپ جۇگىرۋ، دوستارمەن كەزدەسۋ سەكىلدى قىزىعۋشىلىقتاردى ەنگىزۋ كەرەك. ەگەر بۇلاي ىستەمەسەڭىز، ۇيدە جۇمىس جاساۋ كەڭسەدە جاساعاننان گورى ادامدى الدەقايدا جامان سەزىندىرەدى. كۇندە ءبىر نارسە قايتالانىپ جاتقانداي كورىنەدى.
ءبىر كۇن قوعامدىق جەردە جۇمىس جاساڭىز جۇمىس كۇندەرىڭىزدى ەرەكشەلەۋدىڭ ءبىر ءادىسى - جاقىن جەردەگى جايلى كافەدە جۇمىس ىستەۋ. Wi-Fi جەلىسى بار تىنىش جەرگە بارىپ، ءدامدى تىسكەباسار مەن كوفەگە تاپسىرىس بەرىپ، جۇمىسىڭىزعا كىرىسىڭىز. بۇل باسقاشا ويلانۋىڭىزعا جانە ۇيگە الاڭداماۋىڭىزعا كومەكتەسەدى.
ارىپتەستەرىڭىزبەن بايلانىستى ۇزبەڭىز ۇيدە جۇمىس جاساعاندا تەك ءبىر جاۋاپتى اداممەن عانا حابارلاسپاي، بارلىق ارىپتەستەرىڭىزبەن بايلانىستا بولۋعا تىرىسىڭىز. حات جازىڭىز، الەۋمەتتىك جەلىدە دوس بولىڭىز. بىلمەگەنىڭىزدى ۇيالماي سۇراڭىز. ىنتالى بولىڭىز ۇيدە جۇمىس جاساۋدىڭ كەڭسەدەگىدەن اسا ايىرماشىلىعى بولماۋ كەرەك: ەگەر ارى قاراي دامىعىڭىز كەلسە، ىنتالى بولىڭىز.
قىزىقتى جوبالار مەن يدەيالار ۇسىنىڭىز. دامۋ ءۇشىن قوسىمشا ماستەر- كلاستارعا، كۋرستارعا بارىڭىز جانە ءجيى كىتاپ وقىڭىز. كەڭسەدە بولىپ جاتقان ءار جوباعا ءوز كوزقاراسىڭىزدى ءبىلدىرىڭىز.
Massaget.kz
