التاي قالاسىنىڭ قاق ورتاسىندا زىريانوۆتىڭ ەسكەرتكىشى ورناتىلاتىن بولدى
اۋدان اكىمى نۇرجان توقسەيتوۆ جۋرناليستەرمەن وتكەن باسپا ءسوز كونفەرەنسياسىندا قالاداعى زىريانوۆ اتىنا بەرىلگەن كوشە تولىعىمەن جوندەۋدەن ءوتىپ، ونىڭ بويىنا قازىرگى التاي قالاسىنىڭ نەگىزىن قالاۋشى گەراسيم زىريانوۆقا ەسكەرتكىش قويىلاتىنىن مالىمدەدى، دەپ حابارلايدى التاينيۋس ءتىلشىسى.
شاعىن قالا وسى كەزگە دەيىن كەنشىنىڭ ەسىمىمەن اتالىپ كەلسە دە وعان بىردە ءبىر ەسكەرتكىش ورناتىلماعان. گەراسيم زىريانوۆتىڭ بۇگىنگى كۇنگە دەيىن سۋرەتى دە ساقتالماعان ەكەن.
ءمۇسىن جەرگىلىكتى سۋرەتشى ەۆگەني نەپيانوۆتىڭ 1994 -جىلعى سالعان تۋىندىسى نەگىزىندە سومدالاتىن بولادى.
ايتا كەتەيىك، جۋىردا اۋداندىق ءماسليحات دەپۋتاتتارىنىڭ تۇراقتى كوميسسياسىنىڭ ءبىراۋىزدان قولداۋىمەن زىريان قالاسى مەن اۋدانىنىڭ اتاۋىن التاي بولىپ وزگەرتۋ تۋرالى قوعام بەلسەندىلەرىنىڭ ۇسىنىسى ماقۇلدانعان بولاتىن.
ايتا كەرۋ كەرەك، گەراسيم گريگوريەۆيچ زىريانوۆ (1753-1791) - تاۋ-كەن شەبەرى، كەن ورىندارىن زەرتتەۋشى، زىريان كەن ورنىن العاش اشۋشى، زىريان كەنىشىنىڭ جانە ونىڭ جانىنداعى قونىستىڭ نەگىزىن قالاۋشىلاردىڭ ءبىرى.
